در بیان رفتن آمنه با ام ایمن و بردن حضرت رسالت پناه به مدینه‌ی منوره و وفات کردن آمنه خاتون در آنجا
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
6 خولەک
550 بینین
سا حەزرەت سنعش چوون یاوا بە شش
دنیا جە نوورش بی بە مونەققش
ئومم ئەیمەن هەم چەنی ئامینە
حەزرەت بەردشان پەی لای مدینە
چوون فەڕ قدووم ئەعلای ڕافێعە
بەردن وە مەنزڵ «دار النابعةعەرەبی»
یەک ماهـ جەو مەکان گوزەران کەردن
چەنی ئەقارێب شەو وە ڕۆ بەردن
ناگا جە بازی کەچ باز چەپ گەرد
ئامینە شەربەت جام ئەجەڵ وەرد
رۆحش وە ڕەوزەی ڕێزوان بی مەفتوون
هەر نەو جا نەعشش کەردشان مەدفوون
حەزرەت دوود نە فەرق نوورینش خێزا
ئەسرین جە دیدەی نەسرینش ڕێزا
دوعای مەغفێرەت پەی والێدەی پاک
کەردش نەقاپی فەرد تەنیای تاک
سیوای جە حەزرەت هەم ئومم ئەیمەن
کۆ بی وە باڵاش خەم خەرمەن خەرمەن
دەرلاد پەی مەککە موراجعەت کەرد
حەزرەت هەم جە نۆ چەنی وێش ئاوەرد
«عبدالمطلب» حەزرەت دی وە چەم
گێرتش نە باوەش چوون پەروانە و شەم
پەرێ ئامینە کێشا ئاهـ سەرد
نە پەردەی دەروون جەرگش جۆش ئاوەرد
جەو دما پەنا وە قاپی حەق بەرد
وێش وە تەربیەت حەزرەت مەشغووڵ کەرد
جە گاهـ و بێ گاهـ جە وەخت و بێ وەخت
بی بە موستەحفێز ئەو شای بوڵەند بەخت
مەوات موحەممەد فەریاد ڕەس مەبۆ
جە گشت کەس زیاتەر باڵا دەس مەبۆ
عومر شەریفش یاوا بە هەفت ساڵ
سێحر ساحران یەکسەر کەرد بەتاڵ
چەند جە ڕاهبانان کێتاب ئاوەردن
«عبدالمطلب» با خەبەر کەردن
واتن موحەممەد نوور لێش مەوارۆ
سێفات حەزرەت ئێبراهیم دارۆ
ساحێب توڕڕەی موهر نبووەت مەبۆ
یەقین پێغەمبەر ئی ئوممەت مەبۆ
جە موحافێزەش وێت نەکەی غافڵ
مورادت جە لای ئەو مەبۆ حاسڵ
«عبدالمطلب» شادی کەرد غالب
ڕووی خەتابش کەرد وە ئەبووتالب
وات فەرزەند بشۆ جە ئەهل کێتاب
گشت جە موحەممەد مەکەران خەتاب
وە ئومم ئەیمەن هەم واتش جە نۆ
وە زامن دانم موحەممەد وە تۆ
یەک دەقیقە ئەو فەرامۆش نەکەی
هەم شەمع ئۆجاخ من خامۆش نەکەی
دەخیل موحەممەد هەرگێز وێڵ نەکەی
دڵگیر مەبی وێت دڵگیرش نەکەی
«مادام الحياتعەرەبی» زویرش نەکەی
جای چەمەی ئەتهەر زەمزەم لێڵ نەکەی
ئەو جە فەرزەندان ئەرشەد بشمارە
جە بان دیدە نگاش بدارە
بەڵێ هەم جەو ساڵ جەو زێد و ماوا
قەحتیێ عەزیم وە مەککە یاوا
هەفت ساڵ چوون یەک ڕۆ باران نەوارا
زەمین جۆش دا چوون، کۆی سەنگ خارا
وە ئەمر فەرمان «رب العالمينعەرەبی»
بڕیا توخم ڕزق نە ڕووی سەرزەمین
ما و گیا و ئەشیا یەکسەر گشت وەردن
ئەوراق ئەشجار گشت تەمام کەردن
باقی هیچ نەمەند هەنی پەرێشان
مایل بین بە زێبح ئەولاد وێشان
نان بە تەواتور مەبەردن نامش
کەس نمەزانا خۆ چێشەن تامش
یەک ڕوقیە نامێ زەعیفەی بێ عەیب
ئاما وە گۆشش هاتفێ جە غەیب
واتش ئەی مەعشەر تایفەی قورەیش
وەختەن پەرێتان شیرین ببۆ عەیش
وەخت ئەرزانی و ئەمن و ئەمانەن
وادەی پێغەمبەر ئاخر زەمانەن
نامش جە کەونەین دایم سەر تەوقەن
زهوورش مایەی ڕۆزی مەخلۆقەن
باران نافێع بە واسێتەی ئەو
مەوارۆ پێتان چەند ڕۆژ و چەند شەو
تەفەححوس بکەن جە بەین وێتان
یەک شەخسێ بزورگ هانە دلێتان
باڵا بوڵەندەن، سفید ئەندامەن
گوشاد پیشانی، شیرین کەلامەن
ئەو شەخسە چەنی فەرزەندزادەی وێش
هەفت ساڵەی عەزیز، حەق پێ دادەی وێش
بەیان وە تەواف بەیتوڵڵای حەرام
باقی سەنادید زومرەی خاس و عام
وە قەلب تاهێر وە عەقیدەی پاک
جە کۆی بووقەبیس سەر ساوان بە خاک
ئەو شەخسە کەرۆ دوعا پەی باران
ماباقی مەعشەر گشت دەس هۆرداران
قورەیش جەی هاتف چەند شادی کەردن
پەنا وە «عبدالمطلب» بەردن
واتشان هاتف وە تۆش دان وادە
ئینە تۆ و ئانە هەم فەرزەندزادە
هاتف مەنزوورش هەر جە تۆ بیەن
یەقین غەیر جە تۆ کەسێ تەر نیەن
وێت و موحەممەد ماباقی یاران
با یەکسەر بشین وە دوعای باران
چوون سەحەر تلووع فەجر ئاوەردش
«عبدالمطلب» موحەممەد بەردش
تایفەی قورەیش هەر بەتنێ دوو کەس
شین وە «بيت اللهعەرەبی» تیپ تیپ و دەس دەس
«عبدالمطلب» حەزرەت گێرت وە دۆش
لاڵا نە قاپی سەتتار سڕ پۆش
ئەو بە دڵ دوعا، یاران بە ئامین
قەبووڵ کەرد دوعاش بینای بێهتەرین
دەر لەحزە هەورێ ئاوەردش جە سەر
ڕێزنا سەیلاب بە ئەمر داوەر
هەفت شەو تا وە ڕۆ وارا وە تەعجیل
سارا و سەراوان کەرد وە دەریای نیل
تایفەی قورەیش ئەرفەع و ئەشراف
فارغ بین تەمام جە دوعا و تەواف
عەبدوڵڵا جەزعان، مێسل هورەیرە
چەند کەس چوون شەهاب ئێبن موغەیرە
جە ئەنفاس تۆ ئی ڕەحمەت وارا
پەرێ زێندەگی دارا و نەدارا
«عبدالمطلب» مەیل هەر وە فیللا
جواب دا واتش «الحمدللهعەرەبی»
خوڎاوەند دایم لوتفش تا سەر بۆ
«انشاللهعەرەبی» مەبۆ بەندە پەروەر بۆ
جە کەعبەی شەریف موراجەعەت کەرد
دیسان حەزرەتش چەنی وێش ئاوەرد
خوڎا حافیز کەرد جە لای قەوم و خوێش
تا یاوا وە تۆی حەرەم سەرای وێش
«عبدالمطلب» نێسبەت بە حەزرەت
فێشتەر جە فەرزەند مەکەرد مەکرەمەت
دە نەفەر فەرزەند بەرگوزیدە داشت
جوانان خاس پەسەندیدە داشت
هەر دە وێنەی شێر بە شادی و تەرەب
«حارث»، «عبدالله» هەم «ابولهب»
«مقوم» و «ضرار»، «زبیر» و «غالب»
«عباس» و «حمزه» هەم «ابوطالب»
خسووسەن «عباس» مەرد مەیدان گێر
شێر بێ ئەندێش دڕندەی دلێر
بەغەیر جە «حمزة و عبدالله و عباس»
شەهیدان پاک زات حەق شناس
باقی وە حەزرەت ئیمان ناوەردن
گشت وە کافری جە دنیا مەردن
بەڵام ئەو سەردار قەبیلەی قورەیش
«عبدالمطلب» بزورگ خۆش عەیش
دایم پەی حەزرەت وە بێ مودارا
وێنەی دیدەی وێش نگاش مەدارا
مەنزوورش مەداشت بە دیدە و بە دڵ
ساتێ حەزرەتش نمەکەرد غافڵ
نە جامەی خاودا وە شادی و پەڕ قار
کەس یاراش نەبێ بکەرۆش بێدار
هەر حەزرەت مەشی وە دەوان دەو
مەکەردش بێدار جە گشت شیرین خەو
ئەگەر جە خەڵوەت ئەر جە حەرەم بێ
هەر حەزرەت جە لاش دایم مەحرەم بێ
دایم هەر سوجدەی موحەممەد مەوەرد
هەر موشاهێدەی ئێعجازش مەکەرد
مۆبەت و ڕەحمش نەک وێنەی فەرزەند
هەر وە دیدەی ئەو مەوەردش سەوگەند
پەرێ تەفاخور دەور زەمانە
موتتەسێل جە لای خوێش و بێگانە
دایم هەر سەنای حەزرەتش مەکەرد
بە موعجێزەی ئەو سەوگەندش مەوەرد
مەوات موحەممەد دنیا و دینمەن
دمای من هەر ئەو جانشینمەن
خوەلاسەی کەلام ئەو شای خۆش ئێقباڵ
تا عومرش یاوا وە سەد و بیست ساڵ