گفتار در میلاد اسعد آن شفیع روز میعاد و در حوادثی که در آن سبب دست داد
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
4 خولەک
653 بینین
سا چوون جە ئەییام «عيسى بن مريمعەرەبی»
تا وەقت زهوور ڕەسوول خاتەم
هەشت سەد ساڵ تەمام دەور ویەردە بێ
دەوران وە مەردوم بازیش کەردە بێ
جەو دەم مورسەلێ یا ئولول عەزمێ
نەبێ جە دونیا بدەرۆ نەزمێ
مەردوم سەر بە خود بە سەهو و نسیان
مایل بین یەکسەر بە شیرک و عسیان
عەرەب تا عەجەم دنیای دوون تەمام
بەرشین جە ئاداب ئایین ئێسلام
دایم ئێتاعەی شەیتان مەکەردن
سوجدە وە سوورەت بوتان مەوەردن
بەعزێ وە ئاتەش، بەعزێ هەم وە لات
بەعزێ بە عوززا، بەعزێ بە مەنات
هەر یەک وە چێوێ ئیمانش ماوەرد
هەر کام ئێتاعەی سەنگێوەش مەکەرد
جە ناگا نەسیم سوبح سەعادەت
گوشاد کەرد قاپی قەسر هێدایەت
حووریان بەسات شادی نیاشان
دەس دەس ئیسەبرەق مەلبووس پۆشاشان
قاپی جەهەننەم قوفڵش دریاوە
دەروازەی بەهەشت جە نۆ کریاوە
گشت وە هەفت قەڵەم وێش ئارایش کەرد
وێشان وە خوەرشید ئازمایش کەرد
غێلمان وە قەدەح «عن طهورعەرەبی» ەوە
فریشتان وە تەشت پەڕ کافوورەوە
نێدا مەکەردن پەیاپەی وە دەو
مەواتن مەولوود ئەحمەدەن ئێمشەو
ئافتاب جە شەرق عێززەت تلووع کەرد
قەمەر سەر جە بورج ڕەحمەت بەراوەرد
غەرەز، مێهر و ما چەنی سەیارات
سەوابت تەمام سەقف سەماوات
عەرش و کورسی و لەوح «فلك الافلاكعەرەبی»
نوقات و مەرکەز تا دایرەی خاک
جە یومن قەدەم شای «خير الانامعەرەبی»
ڕوشن بی یەکسەر چوون ئایێنەی جام
مەلائێکان گشت مەواتن یەکسەر
بەخ بەخ مەرحەبا «يا خيرالبشرعەرەبی»
حاملان عەرش کەڕووبی تەمام
مەکەردن ئاهەنگ وە هەزار مەقام
خوتبەی وەلادەت موستەفا وەندن
کووس ڕێسالەت ئەحمەدی ژەندن
قەهقەهەی شادی بەرز بی جە دنیا
مەولوود نامەی خاس موحەممەد ونیا
وەحشیات سوجدەی شوکرانە بەردن
حەمد و سەنای حەق وە جا ئاوەردن
مەواتن ئۆخەی شوکرانەی دەم دەم
پەیدا بی حەزرەت شای خەیرە مەقدەم
شێوە شیرین تەر جە «لَيلة القَدرعەرەبی»
سەعیدتەر جە لەیل «يوم فتح البَدرعەرەبی»
دوشەممەی خوڕەم جە مەککەی شەریف
جە قەسر بەیزا مەرتەبەی زەریف
«ربيع الاولعەرەبی» جە دەوازدەهەم
پەیڎا بی حەزرەت ڕەسوول خاتەم
وە قەیچی خەیات کاڵای لایەنام
خەڵات وجوود پۆشا وە ئەندام
کەش و کۆ و کەمەر، سارا و هەرد و بەرد
وە شان حەزرەت گشت ئیمان ئاوەرد
گشت بی بە گوڵزار ڕەنگ کاو و کەش
گوڵان خۆش دەماخ بوڵبوڵان سەر وەش
کلیسا و کەنشت ڕەهبانان جە دوور
ئەو شەو وە جارێ یەکسەر بین خاپوور
بوت و بوتخانەی عەرسەی سەر زەمین
جە سەر تا وە پا شەق شەق بین جە قین
شەیتان یەخەی وێش جە غەرەز کەرد چاک
تەخت و تەلبیسش نگوون بی وە خاک
سەریر شاهان گشت بی سەرنگوون
فەرمان فەرمای دەور توونا بین وە توون
زەبان ملووک گومڕای دڵ جە سەنگ
یەکسەر جە تەقدیر گشت بین لاڵ و لەنگ
وشک بی سەر چەشمەی دەریاچەی ساوە
هۆردا جە مەسکەن موڵک سەماوە
ئەو شەو جەو شەرەف زلزلەی گران
ناگا کەوت وە تاق کەسرای نەوشیروان
جە موعجێزەی پاک مەولوود خاتەم
سەر تاق جامڕێز شەق شەق بی وە هەم
چواردە پارچەی کونگرەی ڕەنگین
جە تاق کەسرا ئاما وە زەمین
ئاتەشکەدەی فارس زەردەشت مەشهوور
هەزار ساڵ تەمام مەگڕیا جە نوور
بەو زەبانەی بەرز نەعرەتە و خرۆش
جە شەو مەولوود حەزرەت بی خامۆش
نە سۆز نە ئاتەش نە ئاتەشخانە
بی بە عێبرەت پەی ئەهل زەمانە