خواهش نمودن شیرین از شیرو و او را سفارش کردن و شیرو را فریب دادن
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
369 بینین
شیرین وات شێرۆ وەعدەت بی تەمام
ئەر مبۆن جە من بیاوی بە کام
هەرچی من ماچوون بگێرەش نە گۆش
پەند و گوفتارم مەکر فەرامۆش
من جە تۆ فێشتەر مەیل تۆ پێمەن
ئیسە عەیب تۆ هەم عەیب وێمەن
جە قەتڵ خوسرەو منیچ خۆشحاڵم
خاس کارێ کەردی، قەزات لە ماڵم
من هەر جە ئەزەل تۆم نە خەیاڵەن
شەیدای عەشق تۆم یە چەندێ ساڵەن
بە جوستوجۆ بیم فرسەتم نەبی
ڕۆبەڕۆ دەردم زیاتەر مبی
بەڵێ ئەر مبۆت پایەت بۆ بە پا
هەرچی مواچوون باوەرەش نەجا
بە تاڵ کەرد بونیاد بە سامان وێت
تا مەردوم بە تیر تانە نەدان لێت
مەگێرە بە وێت جە مەردە ئەساس
نان نامەردی جە ماڵ و میرات
پەرێ چێشتەن سەدای سۆز و ساز
چەنی عالمان ببەر بە هامڕاز
مەکێشە میننەت میرات خوسرەو
مەر تۆ جە شاهی کەمتەری جە ئەو
باد ئاوەر بشکەن، شەودێز بکەر پەی
دەست ئەفشار بوزە نە بەحر بێ پەی
چل ستوون سەرگوم، کیسرا کەر خراو
نە جاگەی جام ڕێز بەراوەرد ئاو
نیکیسا بە تێغ جگەر پارە کەر
باربود دەسبڕ، ئەو ئاوارە کەر
با دەنگ سازان نەیۆ نە گۆشم
جە ماڵ خوسرەو دیدە بپۆشم
دینش نە دیدەم نییەن گەواهی
دیدارش بە دڵ نییەن بە ڕاهی
ئەر مبۆت چەنیم ببی بە هامسە
حەرف واتەی من بە جاگە باوەر
وەختێ حەرف من بە جا ئاوەردی
هەرچی من واتم تۆ پۆسە کەردی
ئەوسا جەودما تاین کەر بە دەو
تەڵەبکەر تەمام موڵک قەڵەمڕەو
موڵک و مەمالیک شاران گرد تەمام
بە ماڵ و مەملووک جە خاس و جە عام
بەیان بێ مدار سەف سەف سەف ئارا
بکێشە شیلان شادی نە سارا
ئەوسا من ڕەزا و ڕەغبەت مدەو پێت
بشنەو نە سەرکار سۆز ساز وێت
ها واتم پەرێت نەسیحەت تەمام
بگێرە نە گۆش، باقی «وَالسَّلامعەرەبی»