گفتگو کردن شیرو در مجلس با شیرین
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
355 بینین
شێرۆ وات: شیرین دڵدار دڵبەر
مەر تۆ جە دەردم نەداری خەبەر؟
حەققا حەققتەن تەوەن لێت وارۆ
کەس جە دەرد کەس خەبەر نەدارۆ
من عەشق شێوەت کارێ پێم کەردەن
هەردەم موازوون ئاوات بە مەردەن
کوورەی کووزەگەر جۆش و تاومەن
زووخ دڵ نە جای خورد و خاومەن
شەوان شومارەی ستارە زانام
بێ خاوی جە تاف ئاوان ستانام
نوجووم ئەختەر ئەفلاک شمەردم
کەوکەب بە کاتب کەیوان سپەردم
دەفتەر خانەی فەرد شەوگارم وانان
حیساب ئەنجوم ئەفلاکم زانان
دوودیم دماوەند بوینە وە توور
ئاهیر دام نەبەند کاو کۆی بلوور
ڕیدای ڕوهبانی، زوننارم بە مل
ڕشتەی ڕەنگمەن نە چاهـ بابل
وەحشی و غەزاڵان هام زوانمەن
تار عەنکەبووت سایەبانمەن
قەقنەس جە قرچەم بی بە کۆی زوخاڵ
جە دوود دەردم ڕێزاش پەڕ و باڵ
پەروانان پەرداخ سەر باڵش ڕێزا
بە نار نەفتم سۆزا و برێزا
بایەقۆش بێزار شەو ناڵینمەن
شەوان سەیل ئەشک نەبالینمەن
بوڵبوڵ بێ قەرار شەو فوغانمەن
شەو شووم شیوەن پەی نەمانمەن
قومری قرچیا، بەرشی جە یانان
هودهود بێزارەن جە شەو وێزانان
کناسە نە چەم، تووتی نە شاران
بوڵبوڵ نە چەمەن، کەو جە نساران
یە گشت تەوەللان جە تاو ناڵەم
ڕیسوایی ڕازم بەرزەن نە عاڵەم
خوسرەو من کوشتم، دنیام بۆ بەتاڵ
یا بیم بە هوونیی قەتڵ کەمەر لاڵ
مەعلووم بۆ جە لای بووم لاڵ تۆ
خوسرەو م کوشتم پەرێ خاڵ تۆ
کێ کەردەن جە یام، ئاهیر بشۆ لێم
کەردم قەسد تەخت قەتڵ بابۆی وێم
شێرین هەرچیم کەرد پەرێ تۆم کەردەن
شەیدای عەشق تۆم، ئیمانم هەردەن
هەنی نەمەندەن تەوانا و تاوم
شەوان نمەشۆ خاوێ نە چاوم
هەنی نەمەندەن تاب و تەوانام
مبۆ بیاوی بە داد و هانام
مبۆ جە وەسڵت بیاووون بە کام
مەتلەبم ئێدەن، باقی «وَالسَّلامعەرەبی»