زفاف کردن خسرو شیرین را
لە کتێبی:
شیرین و خوسرەو
بەرهەمی:
خانای قوبادی (1704-1778)
3 خولەک
421 بینین
خوسرەو دیش شیرین بەو نازەنینی
ئەووەڵ شورووع کەرد ئەو بە گوڵ چینی
جە شادیی شێوەش بەرکەرد نە دڵ خەم
دەم نیان نە دەم هەردک چەنی هەم
ئاخر هۆرێزا خوسرەو بە ئیعزاز
هۆرگرت چەنی وێش شیرنش بە ناز
ئاما نیشت چون شەمع ئەو چەنی شیرین
بۆ نیا نە بۆش چون دەستەی نەسرین
شیرین هۆردارا بە دڵواز دڵ
ئاوەرد بە ئاغۆش چون خەرمان گوڵ
تا بە گوڵ باغچەی دەربەستەش یاوا
چون نەسیم غونچەی مەخفیش شکاوا
جە غونچەش شەونم شەنگەرفی ڕێزا
ڕەنگ قرمزیش شەقایق بێزا
وەختێ بەی دەستوور شای سکەندەر تەور
باش باڵا دەس عاشقان دەور
پەی ئەو بی بە خزر، ئەو شەو سیاهی
وستش نە چەشمەی حەیاتش ماهی
بی بە تەخت میل شا تەختەی عاجش
پاوانەی زەڕڕین پاش بی بە تاجش
یاونا ئەو گوڵ نە سیمین جامەش
شەکەر ئامێز بی عەنبەر شەمامەش
خوسرەو فاریغ بی جەو ئیختیلاتە
جەو سەیر و سەفای پڕ جە نیشاتە
ئیمجار چەنی هەم شیرین و خوسرو
نیشتن بە دڵشاد بە ڕۆ تا بە شەو
سوجدەی شوکر زات خوداوەند بەردن
مەی گوڵ ڕەنگ نە جام فەغفووری کەردن
نۆشاشان بە شاد خاستەر جە دارا
زیندەگیی وێشان بە پووچ نەویارا
ڕوێ شەهەنشای تەخت بۆ عەبیرین
نیشت نە خەڵوەتێ شەو چەنی شیرین
هومیلای زوڵف لوول چەنی هومایوون
سەمەن تورک شۆخ باڵا زەڕ ستوون
تەڵەب کرد نە پای تەخت دوڕ پەیکەر
بەخشا پێشان گەنج نە حەد زیادتەر
هومایوون چەنی گشت وڵگەی ئەرمەن
بەخشا بە شاپوور دانای قەڵەمزەن
هومیلای پڕ لەنج زوڵف و خاڵ سێوەنگ
داش بە نیکیسای شیرین نەغمە و دەنگ
داش بە باربود سەمەن تورک بەناز
نە خەروار گەنج کەردش سەر ئەفراز
***
چون خامەی «خانای قوبادیناسناوی ئەدەبی» بەی تەور
چون «شێخ نیزامی»ی مەرحووم نە ڕووی دەور
جە شەهد و شەکەر شیرینتەر بە دەو
ئینشا کەرد نامەی شیرین و خوسرەو
بە گوفتەی ئەو شێخ مەرحووم دێرین
خوسرەو جە دمای عورووسیی شیرین
بە شەو تا بە ڕۆ وێنەی کەیقوباد
مویارا دەوران ئەی دنیا بە شاد
دایم چون جەمشید مەی نە جامش بی
خاستەر جە شاهان دەور بە کامش بی
مودام غەیر جە جام بادەی عەبیرین
منۆشا شەربەت جە پوستەی شیرین
شەهەنشا هەرچەند بەرز بی ئیقباڵش
چون قەدرێ ویەرد جە سینن و ساڵش
جە کردەی وەرین پەشیمانی بەرد
تەرک لەهو و لەعەب نەزەربازی کەرد
وەختێ جە پیری ڕووت بی پڕ شکەن
وەنەوشەت گێڵیا بە بەرگ سەمەن
موحتاج بی یەکسان چەشمت بە چەشمەک
سست بی بەند دەست ئەعزای تۆ یەک یەک
تاڵ مبۆ تەمام لێت زیندەگانی
مشۆت شیرینی و زەوق جوانی
هەرکەس کۆی پیری وەنەش مبۆ بار
ڕوێ بە سەد دەرد مبۆ گورفتار
هەر تازی سەگێ ئاهوو گیر مۆ
مگێرۆش ئاهوو وەختێ پیر مبۆ
سا کە شەهەنشای کەیخوسرەو دەستوور
موشکی مووی ڕیشش گێڵیا بە کافوور
دەرد بێ دەرمان پیریش بناگۆش
جە مووی سفید کەرد یەکسان کەفەن پۆش
جە بەد عەهدیی چەرخ، جە شەرمەساری
تەرسا، دەست هۆرگرت جە بەد کرداری
گا بە گەنجەفە، گا بە بازیی نەرد
مویارا دەوران ئەی دنیای کەچ گەرد
گا مکەردش لەحن باربود نە گۆش
گا چەنی شیرین مبین هەم ئاغۆش
«القصةعەرەبی» ئەو شای جەم جاهـ جەم بێز
جە شادیی شیرین، نیکیسا و شەودێز
هەرتا زیندە بی مویارا بە شاد
نماماش وە چەم دارا و کەیقوباد