قهرکردن خسرو از شیرین و آمدن به لشکرگاه خود
لە کتێبی:
شیرین و خوسرەو
بەرهەمی:
خانای قوبادی (1704-1778)
4 خولەک
447 بینین
خوسرەو جەی توندی، جەی لەنجە و لارە
ڕووی وێش گێڵنا جە ئەو مەهپارە
ئەو شەو کە ئاهووی ئاشتین پەیکەر
جە سەبزەی دەروون کەردەبێ گوزەر
چەند ئاهوو بەڕێ لەبان پەڕ جە شیر
حەیران جە سەوزەی چەرخ دڵپەزیر
پەیاپای جە هەور تەم ئەنگێز سەرد
گێج دووی ئاهش جە گەردوون ویەرد
کول کول کول کول وەفر جە سەر مڕێزا
هەواش تۆف سەرد دۆزەخ مبێزا
سەراوان جە یەخ چون نوقرەی فوتات
مدرەوشا چون دوڕ نە عەرسەی وڵات
ئەو شەو جە شەم شەوق نەزاکەت فرۆش
هەرچەند لاڵاوە شەهەنشای لاڵ پۆش
ئەوەند لاڵا لێش، ئاخر نەکەرد سوود
نەدیا جە لاوە، نەزاناش وجوود
فرێ سەعیش کەرد مەر ئەو بێ ئەندێش
جە ڕای عاتیفەت ڕەحمێ کەرۆ پیش
هەرچەند کە ماما مدا عەزابش
فێشتەر بە تاڵی مدا جەوابش
سا خوسرەو زانا زوڵف بۆ عەبیرین
گفتوگۆش تاڵەن نمەبۆ شیرین
خێزا هەر ئەو شەو چون سەوڵ نەوخێز
سوار بی بە خیشم نە پشت شەودێز
شا بە «حسب الامرعەرەبی» شیرین دڵبەر
قەدەم بەرد وە پای کۆشک بۆ عەنبەر
تاو تاو جە هیجران شیرین ئەرمەن
سیماب ڕێزنا جە ڕووی یاسەمەن
ئاهش چون کوورەی «ماریج» دۆزەخ
جەنی ڕیزەی وەفر لوولەی تۆف یەخ
چەسپانتەر جە بەرق ڕەخشندەی ڕووی دەور
مەقرەعەش مشەند نە ڕووی عەرسەی دەور
گا بە دانەی دوڕ جە حەسرەت مگەست
بێهۆشانە وار پشت پەنجە و دەست
گا نەرگس بە ئاو سەمەن مکەرد ڕەنگ
گا جون نەی ناڵەش مشی بە فەرسەنگ
بە هەر حالێ بی ئەو بە خاتر ڕێش
یاوا نیمە شەو لەشکرگای وێش
پیا بی جە ئەسپ دەروون پڕ جە دەرد
بە خەرگای موشکین ڕەنگین قەدەم بەرد
جە داخ شیرین شۆخ بەرز دەماخ
نیشت بە خاتر تەنگ نە دڵ کێشا ئاخ
نەدیم و غوڵام حاجیب دا دەستوور
هەر مەند بە تەنیا ئەو چەنی شاپوور
بە نەیرەنگ سازی ئوستاد نەققاش
چۆگە چون سایە کەفت نە خاک پاش
شاپوور دیش خوسرەو سەخت بێ دەماخەن
جە تاڵیی شیرین دەروونش داخەن
واتش: ئیمانم وێت مەدەر بە خەم
جەناب شیرین جەمین جام جەم
ئەر جە سەودای تۆ نمەبی دڵتەنگ
چون زوڵفش چەنیت نمەبی یەک ڕەنگ
جە توندی شیرین بێ دەماخ مەبەر
بە دەگمای عەشقش دەروون داخ مەکەر
لەفزش شیرینەن شەکەر مڕێزۆ
جە شیرینیش ۆش سەفرا مخێزۆ
مەڕەنج ئەر حەرفش تاڵەن ئەو دڵبەر
وێش هەر شیرینەن چون شیرەی شەکەر
شا وات: ئەی شاپوور دانای قەڵەمزەن
دیت چێش کەرد بە من شیرین ئەرمەن
چون بێ مروەتان ئەو شۆخ نامەرد
ئیمشەو چەنی من چەند کەس شانا نەرد
هیچ شەرمش نەکەرد جە شەهریاریم
پەرواش هیچ نەبی جە بێ قەراریم
بەڵێ جە لای ژەن کەم شەرت و بێ شۆن
ئابڕوو و سیرەت، حەیا و شەرم جە کۆن؟
هەرچەندە ئیمشەو، شاپوور نەققاش
لێش لاڵامەوە بۆسام دەست و پاش
نە جە لاڵانم ئەو دڵش بی نەرم
نە جە لاڵ پۆشی زەڕرە کەردش شەرم
زوان چون شمشێر ئەڵماس کێشا لێم
بێحەد و حیساب خەفەتش دا پێم
ڕاسەن کە مەحبووب گا حەرفش سەردەن
نە تا ئەی حەددە ئەو بە من کەردەن
چەند چەنیش بە نەرم سەر کەردم ئیمشەو
چون سەنەم سوجدەی پاش بەردم ئیمشەو
غەیر جە ڕۆ سەختی لێش نەدیم ئیمشەو
هۆردارا جە ڕووش پەردەی شەرم ئیمشەو
هەرچەند چون شیرین زوڵفان عەبیرین
جە هەر هەفت ئیقلیم نیەن چون شیرین
جە شیرینی ئەو، شاپوور، بێزارم
پەی چێش؟ بێحەد دا ئیمشەو ئازارم
یانێ ئەو بێ شەرت کاری پێم کەردن
سەد جار واستەنم ئاوات وە مەردەن
چون جە شاهیی من ئەو نەکەرد ئەندێش
بە شاهیدیی تۆ دەس هۆرگرتم لێش
ئەر زەرد بوو جە دەرد جون وەڵگ خەزان
خاستەرەن جە دین شەخس حاڵ نەزان
بکێشان نە چەم سەد جار میل گەرم
وەشتەرەن جە دین شیرین بێ شەرم
ئێد وات بە شاپوور بە زگارەوە
بەو تاج شاهی، بەو تۆمارەوە
بەدیدەی نمناک کێشا ئاهـ سەرد
بە ستوون شاهی بێخود تەکیە کەرد