qihirkirdin xisru az şîrîn û amdin bih lişkirgah xud
From the Book:
Şîrîn û Xusrew
By:
Khana Qubadi (1704-1778)
4 minutes
448 views
xusrew cey tundî, cey lence û lare
řûy wêş gêłna ce ew mehpare
ew şew ke ahûy aştîn peyker
ce sebzey derûn kerdebê guzer
çend ahû beřê leban peř ce şîr
ḧeyran ce sewzey çerx diłpezîr
peyapay ce hewr tem engêz serd
gêc dûy ahiş ce gerdûn wiyerd
kul kul kul kul wefir ce ser miřêza
hewaş tof serd dozex mibêza
serawan ce yex çun nuqrey futat
midrewşa çun duř ne ’ersey wiłat
ew şew ce şem şewq nezaket firoş
herçend laławe şehenşay lał poş
ewend lała lêş, axir nekerd sûd
nedya ce lawe, nezanaş wicûd
firê se’îş kerd mer ew bê endêş
ce řay ’atîfet řeḧmê kero pîş
herçend ke mama mida ’ezabiş
fêşter be tałî mida cewabiş
sa xusrew zana zułf bo ’ebîrîn
giftugoş tałen nimebo şîrîn
xêza her ew şew çun sewł newxêz
swar bî be xîşim ne pişt şewdêz
şa be «ḧisb alamirArabic» şîrîn diłber
qedem berd we pay koşk bo ’enber
taw taw ce hîcran şîrîn ermen
sîmab řêzna ce řûy yasemen
ahiş çun kûrey «marîc» dozex
cenî řîzey wefir lûley tof yex
çespanter ce berq řexşindey řûy dewr
meqre’eş mişend ne řûy ’ersey dewr
ga be daney duř ce ḧesret migest
bêhoşane war pişt pence û dest
ga nergis be aw semen mikerd řeng
ga cun ney nałeş mişî be ferseng
be her ḧalê bî ew be xatir řêş
yawa nîme şew leşkirgay wêş
pya bî ce esp derûn piř ce derd
be xergay muşkîn řengîn qedem berd
ce dax şîrîn şox berz demax
nîşt be xatir teng ne dił kêşa ax
nedîm û ẍułam ḧacîb da destûr
her mend be tenya ew çenî şapûr
be neyreng sazî ustad neqqaş
çoge çun saye kefit ne xak paş
şapûr dîş xusrew sext bê demaxen
ce tałîy şîrîn derûnş daxen
watiş: îmanim wêt meder be xem
cenab şîrîn cemîn cam cem
er ce sewday to nimebî diłteng
çun zułfiş çenît nimebî yek řeng
ce tundî şîrîn bê demax meber
be degmay ’eşqiş derûn dax meker
lefziş şîrînen şeker miřêzo
ce şîrînîş oş sefra mixêzo
meřenc er ḧerfiş tałen ew diłber
wêş her şîrînen çun şîrey şeker
şa wat: ey şapûr danay qełemzen
dît çêş kerd be min şîrîn ermen
çun bê mirwetan ew şox namerd
îmşew çenî min çend kes şana nerd
hîç şerimş nekerd ce şehryarîm
perwaş hîç nebî ce bê qerarîm
bełê ce lay jen kem şerit û bê şon
abřû û sîret, ḧeya û şerim ce kon?
herçende îmşew, şapûr neqqaş
lêş lałamewe bosam dest û paş
ne ce lałanim ew diłş bî nerim
ne ce lał poşî zeřre kerdiş şerim
zwan çun şimşêr ełmas kêşa lêm
bêḧed û ḧîsab xefetiş da pêm
řasen ke meḧbûb ga ḧerfiş serden
ne ta ey ḧedde ew be min kerden
çend çenîş be nerim ser kerdim îmşew
çun senem sucdey paş berdim îmşew
ẍeyr ce řo sextî lêş nedîm îmşew
hordara ce řûş perdey şerim îmşew
herçend çun şîrîn zułfan ’ebîrîn
ce her hefit îqlîm nyen çun şîrîn
ce şîrînî ew, şapûr, bêzarim
pey çêş? bêḧed da îmşew azarim
yanê ew bê şerit karî pêm kerdin
sed car wastenim awat we merden
çun ce şahîy min ew nekerd endêş
be şahîdîy to des horgirtim lêş
er zerd bû ce derd cun wełg xezan
xasteren ce dîn şexis ḧał nezan
bikêşan ne çem sed car mîl germ
weşteren ce dîn şîrîn bê şerim
êd wat be şapûr be zigarewe
bew tac şahî, bew tomarewe
bedîdey nimnak kêşa ah serd
be sitûn şahî bêxud tekye kerd