وفات کردن مریم زن خسرو دختر قیصر
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
475 بینین
مەعلووم بۆ جە لات «خانا»ی خاتر تەنگ
نە عەرسەی دەوران ئەژدەها ئاهەنگ
ئاخر میاوان ئەر شان ئەر دەروێش
هەرکەس بە پاداش کار کەردەی وێش
هیچ کارێ بیللا ئەر یارەن بێچوون
نمەبۆ زایع نە دەور گەردوون
چون خوسرەو پەی مەرگ فەرهاد دێرین
بادەی تەڵخدا بە خورد شیرین
بە ئەمر تەقدیر زات ئیلاهی
مریەم کە بی شەوق پڕ شەوق شاهی
عیفریت ئەجەل نە ڕووی پەردەوە
پف کەرد بە شەوقش، خامۆش کەردەوە
مواچان بەعزێ ساحێب کەماڵان
ئاگا جە ئەحواڵ گوزەشتەی ساڵان
شیرین زەهر تەڵخدا نە خوردارش
جە نەشئەی ئەو زەهر تەمام بی کارش
غەرەز شای جەم بەزم فەرەیدوون شیەم
ئازاد بی چون مەرد جە دەست مریەم
بەڵێ پەی خاتر شاهێ چون قەیسەر
وێش بێ دەماخ کەرد، نە سەر وست ئەفسەر
جە دێبای موشکی بەرگ ڕەش پۆشا
تا مانگێ شەراب گوڵ ڕەنگ نەنۆشا
چون مەوت مریەم بە شیرین یاوا
بەرشیش نە دڵ خار، چون گوڵ شکاوا
سا شیرین جە دەس خار ڕەقیب ڕەست
دەمادەم سوجدەی شوکرش بەرد پەیوەست
بەڵێ جە ڕای عەقڵ دانشمەندی و هۆش
هەم پەی خاتران شەهەنشای لاڵ پۆش
ئەویچ ت مانگێ شەراب نەنۆشا
بەرگ سەوادیی ئازیەتی پۆشا
چون ئەو جام جەمین جەمین جام جەم
هۆرێزا نە ڕاش غوبار مریەم
ئاوەرد بە خاتر ڕۆیێ بە دڵخواهـ
نامەیێ شیرین بنویسۆ پەی شاهـ