شندین خسرو عاشقی فرهاد را
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
486 بینین
مونشیی شیرین مەشق عەتارید ڕەقەم
پەرێ عاشقان دەروون سفتەی خەم
بەی تەور کەرد تەحریر موشکین خامەی ئەو
ماجەرای فەرهاد شیرین و خوسرەو
مەترەمێ جە ئەهل خەدەمەی پڕ هۆش
یاونا بە عەرز خوسرەو لاڵ پۆش
فەرهاد چینی ج فکرێ پێتەن
جە عیشق شیرین ئاشفتە و شێتن
کەڵپۆس سەوداش شەندەن بە کۆڵدا
چەنی وەحشیان وێڵەن بە چۆڵدا
بە ئەسرین جە داخ ئەو موشکین عوزار
ڕووی سارا کەردەن شەنگەرفی و گوڵنار
جە سەحرای جونوون بەو تەور دلێرەن
نە پەرواش جە شێر، نە جە شمشێرەن
ماچۆ من خەستەی کڵاف سۆسەنیم
کوشتەی شیرینیی شێوەی ئەرمەنیم
هەر هەفت ڕۆ جارێ بە دەوان دەو
پەی پابۆس مشۆ وە پای قەسر ئەو
ئەی دەستان بە سەمع خوسرەو چون یاوا
چمان بە خەنجەر جەرگت شکاوا
هەرچەند پەی ئەو شۆخ زیاد بی شەوقش
بەڵێ هیچ نەمەند جە دڵدا زەوقش
پەی چێش کە دنیا یە بازارشەن
هەر جینسێ دوو کەس خڕیدارشەن
بەی تەورەن دەستوور جە لای سەودا کەر
بەهای ئەو جینسە مبۆ گرانتەر
ئەمما جە غیرەت فەرهاد بێ خەو
غیرەت زیاد کەرد فراوان خوسرەو
سا خوسرەو سەودای شیرین دڵبەر
کەفت نە خەیاڵش جە فەرهاد بەدتەر
موختەل بی عەقڵش، عاجز بی تەمام
جە کار فەرهاد سەرعی بی سەرسام
بەڵێ دەستوورەن نە عەرسەی دەوران
وەختێ کار سەخت ڕوو دۆنە ئینسان
ئەر چو ئەفلاتوون موو شکاو مبۆ
فرێ پێش خەریک هەم خەرکاو مبۆ
خوسرەو کەرد بە هۆش ڕەوشنەیی زەمیر
ئەی کار بە دەست ڕوجووع تەدبیر
پەی چێش؟ مواچان یە پەند پیرەن
تەحلیل موشکوڵ هەر بە تەدبیرەن