şindîn xisru ’aşiqî firhad ra
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
262 Dîtin
munşîy şîrîn meşq ’etarîd řeqem
perê ’aşiqan derûn siftey xem
bey tewr kerd teḧrîr muşkîn xamey ew
maceray ferhad şîrîn û xusrew
metremê ce ehil xedemey piř hoş
yawna be ’erz xusrew lał poş
ferhad çînî c fikirê pêten
ce ’îşq şîrîn aşfite û şêtin
kełpos sewdaş şenden be kołda
çenî weḧşyan wêłen be çołda
be esrîn ce dax ew muşkîn ’uzar
řûy sara kerden şengerfî û gułnar
ce seḧray cunûn bew tewr dilêren
ne perwaş ce şêr, ne ce şimşêren
maço min xestey kiłaf sosenîm
kuştey şîrînîy şêwey ermenîm
her hefit řo carê be dewan dew
pey pabos mişo we pay qesir ew
ey destan be sem’ xusrew çun yawa
çiman be xencer cergit şikawa
herçend pey ew şox zyad bî şewqiş
bełê hîç nemend ce diłda zewqiş
pey çêş ke dinya ye bazarşen
her cînsê dû kes xiřîdarşen
bey tewren destûr ce lay sewda ker
behay ew cînse mibo giranter
emma ce ẍîret ferhad bê xew
ẍîret zyad kerd firawan xusrew
sa xusrew sewday şîrîn diłber
kefit ne xeyałş ce ferhad bedter
muxtel bî ’eqiłş, ’aciz bî temam
ce kar ferhad ser’î bî sersam
bełê destûren ne ’ersey dewran
wextê kar sext řû done însan
er çu eflatûn mû şikaw mibo
firê pêş xerîk hem xerkaw mibo
xusrew kerd be hoş řewşineyî zemîr
ey kar be dest řucû’ tedbîr
pey çêş? mwaçan ye pend pîren
teḧlîl muşkuł her be tedbîren