لابه نمودن خسرو از شیرین و بی دماغ شدن شیرین از خسرو
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
488 بینین
خوسرەو جە شیرین شۆخ شیرین حاڵ
چون نا موافیق شنەفت ئەی هەواڵ
زاناش کە ئەو شۆخ زوڵف بۆ عەنبەرەن
بە دەم موسوڵمان، بە دڵ کافەرەن
دیسان جە عەزرەت چون نەی ناڵاوە
گرتش دامانش، فرە لاڵاوە
واتش مروەتەن دەوا کەر دەردم
وسەن حەرف سەرد یا جە داخ مەردم
خاس نیەن چون تۆ سەوڵ سۆسەن خاڵ
یەند بێ مروەت بۆ نەزانۆ بە حاڵ
ئەر پەی وەسڵ تۆ قیبلەگاهیی من
بە جای تەخت و تاج پادشاهی من
مەویا، بەی دەستوور من جە لای وەتەن
پەی چێش وێڵ مبیم جە وڵگەی ئەرمەن
ئەرێ شەکەر لەب، شەربەت ڕێزەی ڕاز
شۆخ شیرین ڕەنگ، نازک غەمزە و ناز
تۆخۆ والا قەدر، حەق پێ دادەنی
نەجیب پاکزاد، بزورگ زادەنی
مەویا نە ڕای من سەعیت بکەردا
ڕەویەی بزورگیت وە ڕا بوەردا
ئەر شەرمت نیەن جە پادشاهیم
بتەرسە جە ئاهـ سوب سەحەرگاهیم
مەکەرەم سوبوکتەر، چەمی بکەر لێم
باوان وێران بای بزانە من کێم
مەر هەرکەس شیرین عەنبەربۆ مبۆ
چەنی دۆس وێش وێنەی تۆ مبۆ
مروەتەن ئیمشەو ئیمان و دینم
جە باغچەی وەسڵت بکەر گوڵچینم
غەرەز ئەو خوسرەو جەم جای جەم ئەفسەر
لاڵا جە شیرین ئەو شەو تا سەحەر
جە لای ئەو سەشار دورد بادەی دەرد
لاڵە و نزای شا قائیدەش نەکەرد
چون جام یاقووت خورشید خاوەر
ڕەخشان کەرد بلوور ڕەخشەندەی سەحەر
خوسرەو جە سەودای ئەو دڵ جە سەنگە
ئەو شۆخ شیرین دیدە سێوەنگە
بێ تاو بی تەمام قەرارش نەمەند
چون شەو چرای شەم دەروونش گۆ سەند
هۆرێزا وە پای شای زەڕڕین میغفەر
شیرین گرت ئاغووش جە گیان شیرینتەر
هەرچەند کەرد ئەو شۆخ فرێ تار و تۆر
جە دەست خوسرەو بەرنەشی وە زۆر