رسیدن شیرین به مدائن و آمدن خسرو به ارمن
لە کتێبی:
شیرین و خوسرەو
بەرهەمی:
خانای قوبادی (1704-1778)
3 خولەک
600 بینین
نەخشندەی ئەی نەخش شۆخ زەڕنیگار
بە خامەی میشکین ئاڵای عەنبەر با
بەی تەور کێشا نەخش نامەی عەنبەرین
چون جەو چەشمەی ساف بێ پەروا شیرین
چون ئاهو جە خۆف خوسرەو گورێزا
بە هەرداندا ڕێزەی میشک ڕێزا
قەترەدا چون باد بە دەوان دەو
تا یاوا ڕۆیێ بە مشکۆی خوسرەو
پەرستاران دین پڕ شوعلە و شەوقی
حەڵقەی زوڵف لوول چون پاچەی تەوقێ
پڕ شکۆ و شەوکەت، یەک شەهریارێ
شاباز شێوەیێ، شیرین سوارێ
مدران نە قاپیی مشکۆی بۆ میشکین
بە دەماخ بەرز چون خاقان چین
چەند هەزار عیشوە و گریشمە پێشەن
ماچی «پەری دوخت» چینی هەر وێشەن
نە فەرقش تۆمار تەڵا نە نیشان
ڕەخشانەن چون قورس خورشید ڕەخشان
زاناشان یە ئەو عەنبەر پەروەردەن
کە خوسرەو پێشان سفارش کەردەن
بۆساشان ڕیکاب یاران گوڵ بێز
کەردشان پیا نە پشت شەبدێز
بەردشان بە ناز ئەو حۆری سروشت
بە مشکۆی خوسرەو چون ڕەوزەی بەهیشت
نیاشان نە تەخت شاهانە دەستوور
درەخشا چون شەمع تەجەللای کۆی توور
بە شۆڵەی جەمین قورس ئافتاو بێز
مواتت گڕ وست نە مشکۆی جام ڕێز
گشت حەیران مەندن نە شۆخ و شەنگیش
جە شکۆ و شەوکەت، جە سام سەنگین
خەدەم و خواجە و غوڵام شاهی
چون دیشان ئەو شەمع نوور ئیلاهی
واتەن پەرێمان چمان کە خسرەو
شەماڵەی ئاهیر کیاستەن بە دەو
ئەڵلا یە چ شەمع شوعلەی نوورێوەن
یە چ سایەی سام شا دەستوورێوەن
شەخسێ بەی تەرکیب، بەی شۆخ و ڕەندی
بەی دەست و باهوو، بەی دڵپەسەندێ
نە خاقان چین، نە شای کەیخوسرەو
جە «مدة العمرعەرەبی» هەم نەدیەن بە خەو
ئاخر بە ئەدەب ئەو پەرستاران
ئەو شەکەر ڕازان عەنبەرچەداران
هەم جە نەو دیسان پا بۆسش کەردن
سوجدەی پای سەریر خوسرەویش بەردن
واتن هەی سالار سپی تەتاران
باش باڵا دەس زوڵف عەنبەرداران
دڵ بییەن یەکسان تەرسان جە سامت
ئەسڵت چ کەسەن، جە کۆن مەقامت
جەناب عولیای مەریەم ئاستین
شیرین شەوق نادیرەی زەمین
غونچەی لەب بە لەنج شکاوا چون گوڵ
وات نەونەمامان زوڵف دەستەی سونبوڵ
شەرح واقعیات من جە حەد شیەن
ئیزهارش پەی کەس موناسب نیەن
بەڵی ئەسپ من عاڵەم بەهاشەن
بەڵکە گشت عاڵەم بەهای یەک پاشەن
یاگەش پڕ جە نەقش، زنجیرش زەر بۆ
دانەش با جە نوقڵ بادام تەڕ بۆ
هەر شام، هەر سەحەر پۆل مودبیران
ئاوپاشیی یاگەش بە گوڵاو کەران
پۆل خاڵ خاسان منەت مبەردن
بە تەورێ کە وات بە جاش ئاوەردن
بەڵێ میشک بۆیان مشکۆی زەڕنیگار
ئەو تەبەرزەد ڕاز، جام جەم ڕوخسار
شیرین بە کەنیز گومان مکەردن
جەو بۆن خزمەتش بە سەرد مکەردن
ئەویچ چەنیشان وێنەی پەرستار
مویارا دەوران دەور ڕۆزگار