risîdin şîrîn bih mida’in û amdin xisru bih armin
From the Book:
Şîrîn û Xusrew
By:
Khana Qubadi (1704-1778)
3 minutes
366 views
nexşindey ey nexiş şox zeřnîgar
be xamey mîşkîn ałay ’enber ba
bey tewr kêşa nexiş namey ’enberîn
çun cew çeşmey saf bê perwa şîrîn
çun ahu ce xof xusrew gurêza
be herdanda řêzey mîşk řêza
qetreda çun bad be dewan dew
ta yawa řoyê be mişkoy xusrew
peristaran dîn piř şu’le û şewqî
ḧełqey zułf lûl çun paçey tewqê
piř şiko û şewket, yek şehryarê
şabaz şêweyê, şîrîn swarê
midran ne qapîy mişkoy bo mîşkîn
be demax berz çun xaqan çîn
çend hezar ’îşwe û girîşme pêşen
maçî «perî duxt» çînî her wêşen
ne ferqiş tomar teła ne nîşan
řexşanen çun qurs xurşîd řexşan
zanaşan ye ew ’enber perwerden
ke xusrew pêşan sifarş kerden
bosaşan řîkab yaran guł bêz
kerdişan pya ne pişt şebdêz
berdişan be naz ew ḧorî siruşt
be mişkoy xusrew çun řewzey behîşt
nyaşan ne text şahane destûr
direxşa çun şem’ tecellay koy tûr
be şołey cemîn qurs aftaw bêz
mwatit giř wist ne mişkoy cam řêz
gişt ḧeyran mendin ne şox û şengîş
ce şiko û şewket, ce sam sengîn
xedem û xwace û ẍułam şahî
çun dîşan ew şem’ nûr îlahî
waten perêman çiman ke xisrew
şemałey ahîr kyasten be dew
ełla ye çi şem’ şu’ley nûrêwen
ye çi sayey sam şa destûrêwen
şexsê bey terkîb, bey şox û řendî
bey dest û bahû, bey diłpesendê
ne xaqan çîn, ne şay keyxusrew
ce «midة al’imirArabic» hem nedyen be xew
axir be edeb ew peristaran
ew şeker řazan ’enberçedaran
hem ce new dîsan pa bosiş kerdin
sucdey pay serîr xusrewîş berdin
watin hey salar sipî tetaran
baş bała des zułf ’enberdaran
dił bîyen yeksan tersan ce samit
esiłit çi kesen, ce kon meqamit
cenab ’ulyay meryem astîn
şîrîn şewq nadîrey zemîn
ẍunçey leb be lenc şikawa çun guł
wat newnemaman zułf destey sunbuł
şerḧ waq’yat min ce ḧed şyen
îzharş pey kes munasb nyen
bełî esp min ’ałem behaşen
bełke gişt ’ałem behay yek paşen
yageş piř ce neqiş, zincîrş zer bo
daneş ba ce nuqił badam teř bo
her şam, her seḧer pol mudbîran
awpaşîy yageş be guław keran
pol xał xasan minet miberdin
be tewrê ke wat be caş awerdin
bełê mîşk boyan mişkoy zeřnîgar
ew teberzed řaz, cam cem řuxsar
şîrîn be kenîz guman mikerdin
cew bon xizmetiş be serd mikerdin
ewîç çenîşan wêney peristar
muyara dewran dewr řozgar