amdin xisru û bih birdi’ û amdin mîhin banu bih astiqbal
From the Book:
Şîrîn û Xusrew
By:
Khana Qubadi (1704-1778)
2 minutes
363 views
xamey şîrîn nexiş şox ’enberîn
bey tewr kerd teḧrîr ey namey şîrîn
çun xusrew ne dewr ew çeşmey zulal
dûr kefit be diłtengibe xatir melal
be her menziłê çun berq myawa
ahiş çun şehab gerdûn mişkawa
her şew ce hîcran ta sub minała
seyl esrînş kwan mimała
mişî be fersex deng nałînş
teř mibî be zûx zamet bałînş
bełê be umêd wesił perîzad
muyara sat sat řozgar be şad
ẍerez ta be merz kohistan yawa
berq henaseş sema mişkaw
çun ce kohistan ermen kerd guzer
serḧed nişînan ew bûm û ew ber
zanaşan berzen payey îqbałş
wêşan mumtaz kerd be îstîqbałş
kêşaşan pêşkeş şahane be řenc
ce dêba û ce esp, ce esbab û genc
çendî cew mekan ew wêne dara
be şadî û be ’eyş ’uşret muyara
çoge hem xusrew şay dara nigîn
newey newşîrwan nadîrey zemîn
swar bî we řexiş bad pay piř huner
ne mułk muẍan be dew kerd guzer
yawa be mekan feřbexiş şîrîn
be cay ew yaran zułf bo ’enberîn
çun mehîn banû řazan şeker řêz
yawa pêş eḧwał xusrew perwêz
çenî supa û san şox zeř baf puş
ḧewbe û des şîrîn, ney ejder be doş
şî be îstîqbał şay kîsra nejad
sanîy newşîrwan saḧêb ’edił û dad
be řesim şahan pêşkeş berdin
enfas şahan be ca awerdin
nîşt ne xizmetiş ta hefit řo temam
noşa çenîş cam badey ’enber fam
banûy piř temkîn saḧêb sayey feř
be cay text nya perêş textey zeř
ce dimay hefit řoz horêza yek şew
’erz kerd we pay text feřbexiş xusrew
wat min ce xidmet şa êd ercûmen
çun wełgey berde’ germesêr bûmen
zimistan çoge xem derîm we bad
be ’eyş û ’uşret be xatir guşad
xusrew pesend kerd ḧerf ew diłber
çun sub ce meşrîq şu’lewer bê xor
xeymey xusrewî be dew bar kerdin
teşrîf şerîf be berde’ berdin
banû ce xidmet ew şay bê nezîr
be şew hem be řo hîç nekerd teqsîr