چاوەڕێ
لە کتێبی:
کاروانی خەیاڵ
بەرهەمی:
هێدی (1927-2016)
2 خولەک
1061 بینین
ڕازی من ون ناکرێ تازە هەتا دیدەم هەیە
کار لە حاشا دەرچووە، دیدە ئەوەندەی نەم هەیە
ئای لە دەس دیدە و دڵی خۆم، چم بەسەر هات، ئەی چلۆن
یان لە تای ئەودا دەلەرزم، یان مچوڕکی ئەم هەیە
شێت هەیە ئاگای لە کاری خۆشەویستی هەر نییە
ئەو بە دێوانەم دەزانێ، من پەژارەی وەم هەیە
ماڵی ئاوا بێ ئەڤین چیرۆکی هێند لێ کەوتەوە
لەیل و مەجنوونیش تەواو بێ، داستانی مەم هەیە
خاڵ و لێوی چۆنە داخوا هێندە جووتن پێکەوە
وەک بزانم وردە ڕازێکیان وەکوو هاودەم هەیە
بادە نین واژەی من و تینووی ئەڤین وا مەست دەکەن
هەر دەڵێی پەیمانە پەیوەندی لەگەڵ بەستەم هەیە
من خەمی خاڵێک دەخۆم، تەنیا ئەوەندە و هیچی تر
لەو جیهانە گەورەدا هەر ئەو خەمە وردەم هەیە
چاوەڕێ بووم چەند بە چەند بۆ دیتنی، ئەمما نەبوو
ئەو نەهات، یان هەر لەبەر چاوی من ئەوڕۆ تەم هەیە؟
شیعر و بادە، مەستی دێنن وەک یەک ئەمما سەیرە پێم
بۆ لە سەرخۆشیی شیعردا، هێندێ ڕەنگی خەم هەیە
بێوەفاییم گەرچی لێ دیوە بەڵام بەو حاڵەوە
هێشتە هەر بۆ نازی وی، کڕیاری وەک من کەم هەیە
«هێدیناسناوی ئەدەبی» بەڵگەی زۆرە بۆ هاوار و شینی نیوەشەو
گەر پەڕی پەروانە سووتا، شاهیدی وەک شەم هەیە