قەڵاچۆی دوژمن
لە کتێبی:
پاشمەرگەی قانع
بەرهەمی:
قانع (1898-1965)
2 خولەک
937 بینین
با هەموو جووتیار و پاڵە و ڕەنجبەران
یەک گرن تا دەبنە هێز و پشتیوان
هەڵگرن یەکسەر دروشمی هاوبەشی
بێ جیاوازی لەسەر ڕەمز و نیشان
هەڵگرن پاچ و چەک و بێڵ و قەڵەم
هەر لە ڕۆشنبیر هەتا شوان و سەپان
هەڵتەکێنن ئەم نیزامە بۆگەنە
دابڕێژن کۆشکی یەکسانی ژیان
تێکی بشکێنن وزە و ئامانجی بەگ
تەفروتوون کەن، ڕیشەکێش کەن میر و خان
کاکی کۆلاک دەس لە گەردن هەڵبەسێ
تا بڵێن: ها یەکیەتی دەستی شکان
ئەرز و ئاو بۆ چینی جووتیاری هەژار
بەرهەمی نۆش کا وەکوو نۆشی گیان
ئێوە شۆڕشگێڕ بن پێشڕەوتان هەیە
یەکیەتی چەن کۆشکی شاهانەی ڕمان
کۆمەڵی سۆشیالیزم بنیان بنێن
تاوەکوو ببنە نموونە بۆ جیهان
کۆمەڵێک بن پڕ لە بڕوا و یەکیەتی
ئاگرێک بن بۆ گیانی زاڵمان
نۆکەر و سەرمایەداری چاوچنۆک
شاربەدەر کەن، دەربەدەر کەن بێ وچان
ئەوکەسەی خوێنی ئەنۆشین وەک شەراب
سەرنیگون کەن، بیکەنە پەندی زەمان
قەت لە باڕووت و گولە و شەستیر و خوێن
سڵ نەکەن تا ئەچنە هەوارگەی گەلان
ئێوە بنچینە و بناغەی کۆمەڵن
نەزری شانی ئێوەیە ئەرکی ژیان
تێخرۆشن، تێبکۆشن، کۆڵ نەدەن
تا بە زۆر بیهێننە دەس مافی ڕەوان
نووکی پاچ و بیری ورد و هێزی لەش
ببنە بورکانێک لە گیانی دوژمنان
ڕێکی خەن یاسا و نیزامی هاوبەشی
با بڕووخێ شاە و تەختی خائینان
بەگلەر و سەرمایەدار و خان و میر
پەت بکەن ڕایانبکێشن بۆ نەمان
ئەو حەلەی کاتێ وڵات ڕزگاری بوو
پیاو و ژن، پیر و جوانتان شان بە شان
هەوڵ بدەن بۆ ئاوەدانی و مەعریفەت
تاکوو بێنە ڕیزی پێشکەوتووی جیهان
ئەودەمەش ڕۆڵەی پرۆلیتاری کورد
دەبنە ڕابەر بۆ وڵاتی کوردسان
کاشکی یاسایەکی تازەم ئەدی
پڕ لە سوود بێ بۆ گەل و بۆ نیشتمان
چارەنووست خۆت ئەبێ دیاری بکەی
نەک تەمایەر بی کە بۆت کەن هەندەران
قانعاناسناوی ئەدەبی سا تۆش لەگەڵ لاوانی کورد
ڕوو کەنە مەیدان وەکوو شێری ژیان