شینی نانەوازادە
لە کتێبی:
سروەی بەربەیان
بەرهەمی:
قانع (1898-1965)
2 خولەک
697 بینین
کوردە! وا دیسان شین و زاریمە
زایەڵەی چەمەر بێقەراریمە
قارەمانی کورد، زادەی کوردستان
نانەوازادە، شێری نیشتمان
بۆ ئازادیی کورد، بە میهرەبانی
گیانی شیرینی کرد بە قوربانی
هەر ئەو شەربەتە شێخ سەعید نۆشی
دوکتور فوئادی خستە سەرخۆشی
کە شێخ قادری ناردە ناو مێژوو
سمکۆی کرد بە کان وەفا و ئابڕوو
ئەمیش ئەو پیاڵە، ئەو مزە، ئەو مەی
ئەو بەزم، ئەو بیسات، ئەو شادی و هەی هەی
هەر وا ئەو شەربەت ئاڵی گوڵناری
کرد بە نۆش گیانی، بۆ فیداکاری
بە سووک نەڕۆییشت لاوچاکی پەسەند
پەترۆی زامانی «خۆشەوی» هەڵکەند
لە هەر دوو چاوی کورد و کوردستان
فرمێسک ئەبارێ تا ئاخرزەمان
باوجوود ئەمە پێی ناڵێن مردن
لە ڕێی ئازادی، گیانبازی کردن
خوێنی شەهیدان بۆیە ناوەسێ
توڕڕەی ئازادیی هۆزی ئەنووسێ
وەتەن! موژدە بێ، قوربانیت زۆرە
قارەمانانت ئەیکەن بە نۆرە
سەد هەزار لاوان فیدای ناوەکەت
هاژەی نەسیمی سەرکڵاوەکەت
مەترسە، تازە شکا زنجیرت
پێشەوای مەزن کەوتە تەگبیرت
تازە بەسەر چوو ورەی ئیستیعمار
موژدە بێ کە وا هاتینە ڕووی کار
بێمەوە سەر باس جوانەمەرگەکەم
زووخاوی دەروون، کزەی جەرگەکەم
کاتێ تەشریفی برد بۆ لای یاران
بۆ سەربەستیی هۆز، خۆی کرد بە قوربان
وەتەن بۆ بەروار ساڵی نەمانی
نەوی لە قەڵەم، زۆر بە ئاسانی
بە پیتی ئەبجەد هاتە گفتوگۆ
«ئازیزا لاوچاک، شێری شێران ڕۆحسێبی ئەبجەد: ١٣٦٥ کۆچی»