سەربازی
لە کتێبی:
گوڵاڵەی مەریوان
بەرهەمی:
قانع (1898-1965)
2 خولەک
1596 بینین
سەر لە بۆ سەربازی چاکە نەک لەبۆ چەتفەی گران
دڵ لە بۆ خەمخۆری چاکە نەک لەبۆ میهری کچان
چاو ئەگەر فرمێسکی خوێنین دانەڕێژێ بۆ وڵات
دەک بە کوێری هەر بمێنێ تاوەکوو ئاخر زەمان
دەم ئەگەر هاواری هۆزی خۆی نەکا پڕ بێ لە قوڕ
سینە وەک کۆتر نەناڵێ، پڕ بێ لە ژان
بۆیە شانم پێ ئەوێ، باری خەمم بۆ هەڵگرێ
یا زمانم بۆیە چاکە، ببڕێ وەک تێغی دەبان
بۆ جلیت بازی قسە و مەیدانی فێڵ و دەس بڕین
شەهسوارێکم بە چەشنی ڕوستەمی مازەندەران
بێتە سەر باری کەرەم یەک دانە جۆ نادەم بە کەس
خۆم بە جۆیێ ئەیفرۆشم، ئاو و خاکی نیشتمان
من بە دەم میللەت پەرەستم، خزمەتی کوردان ئەکەم
خوێنی بابیشم ئەڕێژم بۆ تەماعی یەک قەران
ئافەرینم بارەکەڵڵا ئیشی خۆمە چاو و ڕاو
دوو دڵ و سێ دولبەر و چوار مامەڵە و پێنج شەش زمان
تاوێ گاندیم بۆ وەتەن تەرکی هەموو خۆراک ئەکەم
تاوێ شێخی خانەقام و تاوێ جەردەی سەر ملان
تاوێ ئەمبینی ئەفەندیم، عەتر و سابوونم هەیە
لەحزەیێ سەیرم ئەکەی شێخ و مەلا و ڕیشێکی پان
هەر شەوێ پارەم ببێ تەقلیدی سەد خەییام ئەکەم
هەر سەعاتێ مەی نەبوو، بەرماڵ و شانە و تەیلەسان
تاوێ کوردم، ڕانک و چۆغە و مێزەر و پەستەک لە بەر
گاهێ شەپقە، گەهـ قەلەنسوو، گاهێ خوودەی سەر گران