kurdistan
Li pirtûka:
Siruşt û Derûn
Berhema:
Goran (1904-1962)
3 Xulek
2427 Dîtin
kurdistan! cêgamî, cêy hezar sałem;
perwerdey em doł û serlûtke û yałem!
henasem têrbonî bay kwêstante,
dû lêwem parawî befrawante,
sirincim řahatûy zîwî zeřkefte,
be zerdey ser befrî êwarewexte;
gwêm fêre bîstinî xuřey qełbeze,
lew ’astey jûr befre, dawên gyay sewze;
zimanim pişkûtûy qisey cwante,
qisey naw goranîy şaxekante,
hîy naw çîrokî gwê agirdante,
hîy naw laye layey minałante!
qułpê ba xwênî naw demarekanim,
be zebrî ’eşqî to eyda, ezanim!
’eşqî to, ey daykî xom û hawxiwênim
her le piştî bawka çuwe hewênim,
eşçête hewênî kuř û kuřeza,
ta taqê kurd mabê le çyay berza!
***
kurdistan! egerçî dûre dinyay to,
doł û daristanî çoł û tenyay to;
dûrî le şaristan, le jînî taze,
le şewî řûnak û piř le awaze,
piř le pêkenîn û piř le nenûstin,
piř le sûřanewe û piř le kořbestin...
egerçî to dûrî le řojî şaran,
řojî piř le gerdiş, hatuço û cûłan,
řojî piř le zanist, piř le fennî cwan
kitêb û řojname, heykel û meydan!
řojî piř le xorak bo gyan û bo leş,
řojî piř le afret, piř le baẍçey geş...
egerçî to dûrî lem gişt cwanîye,
cwanîyekî tir heye kurdistanîye:
cwanîyek ke destî hunerî yezdan
nexşî kêşawe, nek selîqey fennan!
cwanîyek: kon nabê hergîzawhergîz,
zistan û behar û hawîn û payîz:
cwanîy şaxî sext û dołî qûł û meng,
miley berz, piley xiz, derbendanî teng,
mêrgî sewz, çemî xuř, daristanî çiř,
dêy binarî deştî penagirdî xiř,
de’bay naw eşkewt û masîy gomî şîn,
bałdarî řengawřeng, pepûley nexşîn!
***
bełê! eger bêt û řojê le řojan,
le koşta lêk biden cwanîy herdûkyan,
ew ḧele seranser ebête beheşt,
le lûtkey şaxtewe ta pantayîy deşt!
kurdistan, kurdistan, kurdistanî cwan!
direngîş bête dî awatî goran
derbest nîm, sêberî pîre darbeřûm,
ew tawey eşkênê tase û arezûm:
ke mawye řojî zerd bigate dem kel,
lay jûrûy sertewe ecrîwênê mel;
polî jin, zerd û sûr, ekşê bo naw řan,
şwan ełê be şimşał: «hewrî lar, aman!»
bełam eger bêt û be dû çawî xom
bitwanim bibînim berî hîway tom,
ew ḧele: kurdistan, kurdistanî cwan,
hełpeřîn le min û beste le jyan!