hewrî payîz
Li pirtûka:
Siruşt û Derûn
Berhema:
Goran (1904-1962)
2 Xulek
3457 Dîtin
le deryawe qetarî hewrî bařişt kewte dûy pêşeng,
beser singî çyada çokî dadawe, kiş û bêdeng
be ser payîzî zerda ba be xuř bigrî, be kuł bigrî,
leser axir geła, axir çiłî tenyayî guł bigrî!
be xuř bigrî, be kuł bigrî: beser deşt û derî wişka,
beser darî gełazerda, beser pûşa, beser diřka
beser serçaweyî kizra, beser zîxî çemî dêma,
beser her wişkîyêka wa le hawînî germ cê ma...
bełê bigrî, be kuł bigrî, heta axir diłop bigrî,
be giryey hewrî payîz ba nuqum bê sîneyî kizrî!
befir asoy biłind bigrête çwarçêwey bilûrînî,
le çem hełsê xuře û hajey şepolî awî xwênînî!
diłopî sard û fênk ba leser dar û dewen biřjê,
pepûley zerdî ałtûnî leser liq hełwerê, bipjê
bełê! bigrî hewr, baranî payîz, bê wiçan bigrî,
leser baẍçey gułê wa sîs ebê axir çiłî ’umrî!
bigirmênê, tep û nim dabka, bîkate şest, hergîz,
newestê qułpî giryanî, newestê hewrekey payîz;
tebî’et zerd û jakawe, le ḧałî gyan keniştaye,
nîşaney matemî payîz le firmêskî diriştaye!