geşt le hewraman
Li pirtûka:
Firmêsk û Huner
Berhema:
Goran (1904-1962)
5 Xulek
3706 Dîtin
em geştinameye ke serdemî hełbestinî egeřêtewe bo bîst sałêk lemewpêş, le hełebceCihwe dest pê eka. mayey întîba’atî taqe geştêk nîye, bełkû hest û bînînî çen geştêkî kat û werzî cyacyay pêşû le bîrewerîma pengyan xwardewe, heta bo carî dwayî legeł çen hawřêyekî gyanî, bo çen řojêk, be pêkenîn û goranî witin benaw baxe zorekan û yałe berzekanî hewramana sûřaynewe. îtir em hełbeste le xolasey hemû întîba’atî geştekanî kon û tazem hate dî.
dîmenî řêga û ban
komełe şaxêk sext û gerdin keş
asmanî şînî girtote baweş;
serpoşî lûtkey befrî zor sipî
be daristan řeş nawdołî kipî
cogey awekan tyaya qetîs maw:
her eřon naken pêçî şax tewaw
hawar û hajey kef çeřênî çem
bo tenyayî şew layelayey xem!
tûleřêy barîk, tûnawtûn pişkin
řêbwar exate endêşey bê bin
naw řêga teq teq, lařê berdî zil
ke hêşta gerdûn pêy nedawe til!
ga serewjûre, ga serewxiware
tałî û şîrînîy dinyay řêbware!
řêgay nawbax
pêş ewey bigey be awatî dê
ekşête naw bax tûlemarî řê
şiney sêberî darî gwêz û tû
esřê areqî řêbwarî manû
teskînîy řêgay baxewbaxî wêł
«manû nebî»ye: lem kêł, bo ew kêł!
selamun ’eleyk, mamey bin dargiwêz,
selamî manû le pîrî bê hêz!
merḧeba serçaw, beçkey kakoł qît
simorey ser dar, řołey ziring û zît!
eřoy, her eřoy... tełane û tełan,
emca egeyte pêçî bermałan
dê
kam berbeřoçkey zor basefaye
çeşnî diłî şad dêye, awaye!
xanûy begzade le say derxta
aramîy bûke le koşî bexta
xanûy ehalîş zoryan dûnhom:
hendê qinc û qît, hendê lar û kom
yek le ser yektir, berew lûtkey kêw
bo asman eçin wek pêpîlkey dêw!
le dêda kam cêt gewre berçaw kewt:
małî aẍaye û xaneqa û mizgewt!
jînî dîwexan
ke geyştîte ber dergay gewre
her xizmetkare û lêt eda dewre,
řêt pêşan eden takû dîwexan,
îtir dîwane û merḧebay mîwan
destey xizmetkar: fîşekdan le mil,
be çefte û mişkî ser û teple zil
dest leser xencer çaweřêy ferman:
çi bo serbirîn, çi bo serdanan!
heç kesêk taze bête dîwexan,
kiřnûşê eka be serdanewan,
germe dîwanî şewî begzade,
têkeł û pêkeł babet û made!
melay dîwexan
le jêr mêzera melay nûştawe,
řîşî bo ser sing pirş û biławe,
qyafet peřpût wek kitêbî kon,
zimanî şîrîn, sîmay nextê mon,
bazî řoḧî çeş be şî’ir û edeb,
bełam şêwey zûy ’ecem û ’ereb
bo mîwan bibê mayey tesela
le kořî şewa: melaye û mela!
to û mela û şî’ir û felsefey îslam
gwêřagirtinî tawtawî ’ewam,
be bê zyad û kem dênête pêş çaw:
serincî kwêran le namey nûsraw!
ke dîwan çoł bû, çûyte naw cêga,
dest ekeyte mil xewî paş řêga!
beyan
«ełłahu ekber!» melabangane,
tarîk û lêłî berî beyane
mangî becê maw le seferî şew
zerde le tirsî qaspeqaspî kew!
estêrey meẍrîb wek qetrey emel
kiz kiz etkête naw befrî serkel!
lerêy ewberî şax dengî zeng dê,
le swênî řawker teqey tifeng dê!
wa be tewawî dinya řûnake,
her sîḧrî řûte siruşt êstake!
le dirext eda şiney bay seḧer:
cimucûłyetî çeşnî sewday ser!
leser cogey aş qaz û mirawî
çaweřêy řojin hełbênê çawî,
bełam ta xułqî neka çêştengaw
nayete naw dê pirşingî hetaw!
mizgewt
binçîney mizgewt nîştote naw çem,
řû berew qîble, pişt le cehenem!
mizgewtî katî çêştengawî çoł:
wek mirdû kifnî bêdengî be koł!
sûreçnarî liq û pop dirêj
sêber eka bo xewî berdenwêj!
carcar îmamî tenyay goşey ḧewz:
sersing maç eka řîşî be wenewz!
kesêk bang eda, eşłeqênê gom,
îmam hełdestê: dar be dest, pişt kom!
ta tewaw ebê «ełłahu ekber»
peng exwatewe lafawî nwêjker
nwêj betał ebê, cema’et biław,
çen pîrêk ebin be xiłtey lafaw:
sûçêk germ eken be řazî cwanî,
ax be ba eden bo dinyay fanî!
kanîy jinan
serçawey awêk: kełekêk le ser:
jinêk têy eçê, jinêk dêteder
emeş le dêda kanîy jinane,
qîbley diłdarîy herzekarane!
êwaran pol pol lawî kakoł lûl,
sereřê egirin, sergerm û ’ecûl,
herçen hařey dê heyasey cwanêk,
le hêlaney dem efřî: amanêk!
jin
jinî hewraman: sertapay xişił,
serçawey bonî mêxek û simił,
ta biłêy teřpoş, ał û wała cil,
bejin û bała cwan, beden nerim û şil!
nîwnîgay: xendey estêrey emel,
neẍmey giftugoy wek cirîwey mel!
jînî: beharî ’eşq û cwanî!
cîlwegay ḧusnî: řêy bax û kanî!
goranî
’eşqî êwarey sereřêy kanî,
ber edate çem kiłpey goranî!
řoj awa ebê, çem tarîk daye,
dengî «kina leyl» her dwayî naye
mang be tirîfey nawdê eka keyl,
hêşta her germe nałey «kina leyl...!»
«syaçemane... syaçemane...»
beheştî ’eşqe em hewramane!
ewendey dar û berdî hewraman,
řeḧmet le jinî bejin û bała cwan!
«syaçemane... syaçemane...»
hewraman cêgay syaçemane!