textey mobet taş necařî diłteng
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
802 Dîtin
textey mobet taş, necařî diłteng
gîrî gêcî dam kiłafey şewřeng!
namey ayrîn germî engêzit
dûy pûşî cestey derdînan xêzit
yawa û ḧałîm bî yek yek îşaran
xendem kerd, heyhay, derdeken yaran
er řasen dosît dosekey gyanî
min we dar kołek xeman mizanî
hûnî bêpayan derdim werdebo
tecrebey tořdam ’eşqim kerdebo
hałay girpey derd ew bałay ała
nekûrey derûn negirten bała
damî dûbadey seyadî qatił
nepêçyan ne dewr pay şiksitey dił
firset nekewten bew řeng qadir bo
cefaş firawan, wefaş nadir bo
dexîl zûter kêş pat ew dimawe
negnî ney tořdam we herdû pawe
cew dima we des pay îstîẍnawe
lerzî we ser teł darî fenawe
ser wenet bibo we barî gerden
bwazî her sat awat we merden
ne pey ew řewyey beynetdarî bo
ne pey toyç we merg řistigarî bo
ew sebir, ew taqet, ew tewanay derd
nedît xercim kerd fa’îdeş nekerd
îse soçyay germîy diłserdîm
sewdayî saray derdî bêderdîm
er mijnewî xas, werne mizanû
merg perê toyç mido ne zanû