peşêw wêney wêm nîştebêm xecił
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
1505 Dîtin
peşêw wêney wêm nîştebêm xecił
dîm şadî des da ne derwazey dił
watim: namanî hergîz hay çêşen?
leb berdewe çêş nameyê pêşen
ne tarîkîy xet me’naş mecoşa
çun awî ḧeyat dił xasxas noşa
ax, quwey zemîn derûnim kem bî
bûłekey siftem sereřay xem bî
werne ew şewnim ce serda meweşt
meşya kerdayêş we řewzey beheşt
fermabêt îsa cemîn camî cem
paseyçe nîyen to dînit we çem
nirxî kałakeş ałater bîyen
sed gyan we pûłê bałater nîyen
arê ta pey ew min řomen çun şew
şewqen pey xendey subḧî cebhey ew
ta we eřey derd diłey min şanen
zerîfter tuřřey ew dane danen
ta min dûy siftey cestem fêşteren
celay awêney ew zyadteren
ta siftey qamet min wisme weşen
ebroy ew we řûy dił keman keşen
hay çêşt waten, we řeḧmet şad bî
mer zûter kem bî, îse zyad bî?
er ce zamî dił min nîgat mekerd
mezanat ew zat ew wesfî bêgerd
ew řaz, ew naz, ew qews, ew xedeng
bîyen, hen, mebo, megêłan ce řeng
ḧałş deste mil we îstîqbałen
îstîqbał çenî mazîş yek ḧałen
barê, dił we xişt wêranî awan
ḧeqit we desen nedarî tawan
dił tifił û azîz her řo ne şanê
her ladê terzê, her sat nîşanê
ga çun sitarey tarîkey seḧer
ga qemer, ga xor meyo we nezer
ga we bêstûn hestîy bînawe
ḧusinş we gułgûn weş îstîẍnawe
destî şîrînş mawero we yad
ferhadî ne taq ferqekey ferhad
ga çerxî dîdey sed leyla firoş
kûrey narî naz mawero we coş
ta boy ḧeraret mewcî deryay derd
mecnûn wêney tem bero herde û herd
xało pey celal er kar sazîşen
wadey tecellay tîr endazîşen
bisim alleErebî ew tîr peř têda besteş
êd nîşaney ten sed car şiksiteş
çun řeng kero zam taze zamanim
aw mizo ew dem kone zamanim
zamî ten we tîr bełaş zyater
řay amoşoy dił we laş zyater