berew řizgarî
Li pirtûka:
Dwanî Şêrî Şehîd Osman Ozêrî
Berhema:
Osman Ozêrî (1936-1966)
2 Xulek
465 Dîtin
leser zarî hevałî şehîdî xebatkerî kołneder «emîn banîKes» witrawe. ke jendirme bêwîjdanekanî turkya le bendînxaneda lejêr sizada kuştyan...
lejêr sizada le zîndanî teng
le jûrî tarî bê tirûske û deng
legeł şirîxey qamçî leser leş
ke dirust eka hêłî şîn û řeş
ke birînekan ekulênêtewe
swêy nwêy serlenwê tê yenêtewe
azar û janî wa tê’ezênê
le derûn kispe û so heł’esênê
legeł felaqe û dax û hełwasîn
legeł karwanî lêdanî betîn
ke leş kifit ebê û şîn heł’egeřê
bizmetey konî lê heł’ewerê
yan legeł şîşî be pişko sûra
ke eçzê beser goştî cesûra
qirçeqirç goştî sûr ebirjênê
goşt û pêst û mû gişt esûtênê
yan ke leş hemûy xełtanî xwêne
diłîş şiksitey qise û cwêne
arezûy jyan le jîn torawe
řwîş lawaz buwe û řengî biřawe
legeł ew hemû êş û azare
ke gyan le jînî wa sext bêzare
min hawar ekem ta hîzim tyaye
hawarêkî berz piř bem dinyaye
ełêm «nabezîn» ser nanewênîn
mafî bendibûnman lebin derdênîn
bêbakîn wek zê xwên eřjênîn
heta azadîy xoman estênîn
em leşulare, em jîne sexte
ke xoy lemêje her qoç û bexte
qoçî řizgarîy kurd û kurdistan
ke zor zyatirin le gyan û jyan
hanê kurdistan gyan û gişt leşim
hanê jyanim ba pêt bibexşim
ba bîn be pird, bibin be řêga
bibin be řêbaz kurdî pya biřwa
řoyştinêk yekser bê geřanewe
bebê ladan û awiřdanewe
kewa bibête řoynî yekcarî
řuwew azadî û berew řizgarî