cwanîy behar
Li pirtûka:
Dyarî
Berhema:
Kameran Mukrî (1929-1986)
3 Xulek
2066 Dîtin
twêjałî befrî ẍemgînî ser kel
eřjête naw çem wekû peřî mel
wêney bêhêzî cêmaw le karwan
le xał xał eřjêt şepolî giryan
ke dên le serda bo kořî mirdin
gurcin le tirsî huzarî cirpin
befir eřjête gořistanî şax
nawêrê hergîz bika ax û dax
awî qełbezey sipî û řengawřeng
le gerûy keja eyka be aheng
wextê ke tavge dête pêkenîn
melanî bizêw dêne hełpeřîn
bûkî beharî cwanî řazawe
le kurdistana xeymey hełdawe
wirşey peřey guł wek wirşey nîga
bilbilî ’aşiq boy ebê şeyda
leser lûtekey şax tacî zerdepeř
pirşing ehawê bo naw awî keř
leser kenarî çemî piř neẍme
ew xunçe sûrey nask û nerme
bergî damałî sewzî awdaman
xoy şit be qetrey befrawî kwêstan
wirde şepolî cogeley biław
xitûkey berde le kenarî aw!
guł kasey bade, şewnim bote mey
mel mest û serxoş demî piř oxey
wekû firîşte gułî hełwerîw
leser singî aw, cogey wekû zîw
eřon berew xwar be pişte mele
epjête demyan tîşkî ew kele
gełay pan eka be colane; mel
gujme gujmêtî lem pel bo ew pel!
ya geła mêwêk eka be lanke
şewnim leser guł wekû milwanke
tepawtil lepiř berdêk bo naw doł
dête xwarewe ta ebêt be xoł
wek ewîş şeyday gułêk bê wek lêw
arezûmend bê bo baxî nişêw
şexeł her care core řingêke
awazî gerûy çeşne dengêke
le her cûłeyek dengêk awazê
le her weşeyek ya řaz ya nazê
çend cwane gułî qeyfe bo suxme
nêrgisî nazdar bikey be dugme!
le tem desmałî sipîy zor tenk
şewbo pûlekey cwan denk denk
kîjołey nazdar em deşt û çeme
lar û lencey to bizey toy keme
wirşey kirast ke bê lem deşte
ewsa ke ełêm baxî beheşte!
êware wexte zerdepeřî ał
zemawendî xoş dênête xeyał
ke şew dêt asman estêrey cwanî
be mişt ekate naw demî kanî
guł, pirşing, coge, wenewşey nazdar
hemû diłdaran bo jînî behar
estêre demî naye ser gona
tik tik areqî awringî řija!
le tał tałî guł telî kemane
şemał şimşałî naw ew çemane
bełam ax diřke em sat û wexte
lenaw behara tîj û xoşbexte!