mergî sêber
Li pirtûka:
Guɫ Estêre
Berhema:
Kameran Mukrî (1929-1986)
3 Xulek
964 Dîtin
firîştey şebeq le dirzî
kejawekey xor dabezî
pêy naye çemî mirwarî
wirşey bo hêna be dyarî
giłezerdey cwan gerdin keş
řazayewe be gułî geş
kiçî xincîlaney nazdar
řijane ser ferşî behar
darî şêxebas sêberî
bû be çetrî şêwe perî
çend cwane wirşey qenewz
têkeł be nîgay çaw nêrgiz
lerey desmał pûlekeřêz
diłî diłdar eka bêhêz
kiçołey bejin û bała berz
be tirpey nermî panî berz
wekû firîştey naw beheşt
awazêkî eda be deşt
çon awazêk ta biłêy xoş
neẍmeyekî êcgar becoş
leser niqamî zuřnajen
nerim elerêwe beden
kiras ketanêk bû tenk
kewa şîrdaxêkî nask
wirşey şîrînî kemerçîn
ke eyda le xamekî şîn
dił egrya û pê’ekenî
sed dił eyut ay le bejnî
gêl gêle û pişteser, kirmek
milegoy ser suxmey xamek
hařey lem çeşnane xişił
řay’epeřan pepûley dił
kuřîş sełtekey çoẍey şîn
feqyanekey sipîy befrîn
mişkî û camaney têk’aław
boy şeyda bû egrîcey xaw
semawerî werşaw û zerd
wekû zîw û zêřî bêgerd
takû nîwey be sewzegya
be tebî’et epoşra
çend xoşe le qorîy ’ecem
bom têka çayîyek nuqłedem
way le řewtî kiław ałtûn
zor herzekarî bo mirdûn
likî serpoşî pûleke
leser ew suxme xameke
birîsk û hûř wekû asman
leser baxî singêkî pan
çarşêwî cwanî nokemer
bê’aram bû leser kemer
kuřî ’ebay dox surme poş
diłî fîzî ehate coş
pyawî nêrgeley zîwîn kêş
diłî keylî awat û êş
bonî mêxek û hî simił
ẍemzey benazî řûmet guł
hařey pêkenîn, heyase
ebûn be şepolî tase
pol pol le dewrî semawer
da’enîştin lejêr sêber
sêber bełam hî yek dirext
sêberî deştayîyek text
her şêx hebas bû be tenya
sêberî eřişte ser gya
le sed lawe be dîlane
egêřa ew dare cwane
çaw řeş û çaw kałî xirpin
barîkele û şox û goştin
be dengêkî zor sazgar
firîştekan kiçî nazdar
goranîyan ewt... beste
çił be mirdûy ewt heste
erxewan eyut seyrken
çend cwane gij û gya û çîmen
feqê letaw suxme xamek
kořêkyan egirt hî kewşek
melay řûxoş ke da’ebû
suxteş be serya heł’eçû
ey darekey şêxebas ax
le diłî mina bûy be dax
hatin serbazî ’usmanî
namerdane sûtanyanî
letaw serma û sołey befir
liqyan şikanî bo agir
ew yadeş ew řaburduwe
le diłî mina nûstuwe
hezaran yadî wa beswê
dênewe bîrman ser lenwê
ey darekey her be bîstin
min kewtime xefet řiştin
mird sêberekey şêxebas
sûta dirextekey hebas