řojî kurd
yadî duwemîn sałî koçî barzanî
Li pirtûka:
Bo Kurdistan
Berhema:
Hejar (1921-1991)
2 Xulek
780 Dîtin
le řojgaranî taze û zû
be şayetî danî mêjû
le ’asmanî kurdewarî
le goşey asoy xwênbarî
zor estêre direwşawin
diłman beyadyan nexşawin
qaremananî gelperist
çaw netirsanî gyan lemist
dijî lasarî xwênimj bûn
dost lawên, dagîrker kuj bûn
tirsênerî bêgane bûn
take swarey zemane bûn
ałay azadî leser şan
bê wiçan boman tê koşan
lederdî gel bûne derman
emekyan zore leserman
ba leber çawîş nemabin
leçawî dił nedîw nabin
bo ême cêgey şanazîn
mamostay azadîxwazîn
yadgarî zor bemayen
bo manî kurdistan payen
firîştey bextin leserman
her wan le hewarî herman
***
lenaw koy ew estêrane
lenaw cergey ew şêrane
řûnaktir û geşedartir
hełkewte û aza û bekartir
lem sedeyeda dyarî da
tîşkî le kurdewarîy da
le asoy barzan derkewt
le ’asmanî kurd serkewt
gelawêj û karwankuje
le ḧand ew dewreyan mije
kake mistefa barzanî
be geřnasî û bemêranî
le şewî kurd xoretawe
hêzî henaw, somay çawe
çawî diłî kirdînewe
tirsî lebîr birdînewe
ew şořişgêře bê wêne
ew doste dujmin şikêne
peřandî lemper û perjîn
xistînye ser şeqamî jîn
bo hejaran xoy bext kird
řêgey xebatî text kird
be nebezî û be kirdewe
le dinya giroy birdewe
lenaw giş komeł û çînda
leseranserî zemînda
lesayey ew xebatewe
nawî kurd deng edatewe
ta hestî azadîxwazî
ta xobexşîn û gyanbazî
ta netirsan û bwêrî
ta merdayetî û cwamêrî
le dinyada qedryan mabê
nawî barzanî win nabê