rwane kirdin sirqirna ba firman û xili’ithay gunagun cihit wizîr
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
5 Xulek
730 Dîtin
tekmîl bî teḧrîr ferman şahî
yawer sitana derdem bî řahî
nezdîk bî yawer ne řay îstî’cal
wezîr û serdar kerdin îstîqbal
yawan be nezdîk serqurenay şa
herdû pey te’zîm xel’et bîn pya
yawer bî pya be yek dan hełmet
ser û dest mesrûr bosey meḧebbet
ferman şahî new ca bî guşad
heryek be xel’et wêş bî ser azad
swar bîn new ca we bê midara
ne xeymey wezîr hersê bîn pya
řewneq dan we bezim, serhengan bîn cem
heryek be teşrîf şahî bîn xuřřem
ba her baqî bo bezim ’eqił û ’eşq
satê ce ’ezay mulheme keym meşq
şiksitey ew şew supay mulheme
gurêzan berşîn ne řay sedeme
yawan be ḧuzûr sułtan mecaz
tey kerdin teqrîr waqî’ey diraz
pey qetil serheng mecaz nîşt ne coş
ce buryanîy qelb ten kerd syapoş
yexey wêş kerd çak, xiroşa be qar
ferman da derdem ordû kerdiş bar
řahî bî ordû we bê midara
yawa be ḧudûd, xeyme kerd wepa
ce meẍrîb be top selam dan ateş
qerawił ce beyn dû ordû bî pexiş
dû řewey supa ew şew şîn ne xew
seḧer bêdar bîn supa çun çekaw
sułtan mecaz dił ne xeşim û kîn
araste kerd şan supay sehmigîn
direfşan guşad yemîn meyser
şêwey nimûney sifûf meḧşer
ẍefłet ce meyser, lewwame yemîn
wêş ne qelbigah ba tac û nigîn
cew teref supay serdar û wezîr
řast kerdin sufûf supay bê nezîr
xêza çerxeçî ce beyn supa
germî dan be řezim ḧerbey řezmiga
yeqîn meymene, bêdarî meyser
wêş sitûn qelb ba tac û kemer
serdar ḧeqîq ew řo bî pêş ceng
’ersegay meydan ce merdan bî teng
muqabîl be top xeterey pelîd
tertîb dan be top cazîbey tewḧîd
yek pehlewanê ce supay mecaz
pa nya ne pêş ba nêzey diraz
xiroşa be kîn merd piř heybet
meşhûr bî ne ’am îsimş be tuhmet
ne ’ersey meydan cewlan da merkeb
mubarîz ce san ḧeqîq kerd tełeb
yek pehlewanê ce supay ḧeqîq
îsimş meşhûr bî ew merd be sîddîq
hełmet berd çun şêr, ẍuřřa be tuhmet
watiş hey bedxûy merd bedxesłet
seyf tewekkul derdem kerd ’uryan
aman be hemda ce ’ersey meydan
tuhmet şend perêş yek nêzey sitem
nêzey tuhmetiş qełem kerd derdem
cewdima sîddîq duřindey dilêr
tuhmet teba kerd be zerb şimşêr
yek merd henî be esp da nehîb
îsimş ẍeybet bî merd diłferîb
xiroşa be kîn coş awerd çûn dûd
da ne ferq ser sîddîq yek ’emûd
sîddîq ce sayey îsper bî ẍerîq
neyawa «aslaًErebî» zerer be sîddîq
sîddîq be mewday seyf taze saw
pare kerd ẍeybet be wêney çekaw
sułtan mecaz ce ḧerbey ’umûm
emirş kerd supa baweran hucûm
supay mecazî dest dan be super
awerdin yêrş pey ’ersey xeter
cew teref supay serdar ḧeqîq
kerdişan hucûm çun deryay ’emîq
daxił bîn be hem dû supay piř kîn
ser wêney tigirg wara be zemîn
zemîn le’ligûn, sema sya řeng
hewa bî we dûd ce top û tifeng
be axir serdar ḧeqîq wêney bad
bazûy pehlewî pey ceng kerd guşad
řû awerd be ceng serdar sermest
kemend be bazû, ’emûdê be dest
ateş da be top tewḧîd be yekbar
ce supay mecaz berawerd demar
xiroşa serdar be seyḧey celal
şeca’et ne cerg mecaz bî pamal
zehir zerbetiş menoşa herkes
pest mebî ce xak wêş çenî feres
ce bîm supay serdar ḧeqîq
san sîlsîley mecaz bî ẍerîq
cewdemda yek merd saḧêb zor û sam
meşhûr bî îsimş ne ’am be nemmam
ẍuřřa be serdar, hełmet berd çun şêr
nêzeş hewa da duřindey dilêr
cewdima serdar be quwey ’emûd
řewan kerd nemmam pey seqer çun dûd
be emir serdar zeřřîne kefşan
pey ’ezim hicûm kêşan direfşan
ce bîm serdar quwey qoçaxan
ser tewq ’elem mecaz bî daxan
dest dan be serdar merdan dawxiwaz
şikist dan be tîp sułtan mecaz
supay wezîrî serdar xûnxar
kerdişan te’qîb be qetił û telar
kerdişan ẍaret supay hezîme
ne esp û êstir, ce ferş û xeyme
sułtan mecaz hem wêş bî esîr
bend bî ce qullab serpencey zincîr
seḧîḧen ḧedîs nebî, berḧeqqen
derḧeq be herkes «menْ deqّe duqّeErebî» n
mecaz meḧbûs kerd sułtan zemîr
ha wêş meḧbûs bî ne ḧełqey zencîr
hem sułtan dił ce bend bî azad
hem xerabey şer’ kerdişan abad
hem ’erîzey new ce fetiḧ bî fitûḧ
kerdişan teqdîm be sułtan řûḧ
hem kerdin te’în mew’îzey îfham
mułk şerî’et awerd be nîzam
hay «derwêşNasnava edebî» ney ca bigêre qerar
ce emmarey şûm bawerîm exbar