şibîxun nimudin sirdar bir sipay milhimh û qitilş
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
3 Xulek
756 Dîtin
serdar ḧeqîq xiroşa çun bad
çenî supay wêş swar bî derlad
dû ḧîssey şew şî bikerdiş yêłẍar
nezdîk bî ce san mulhemey şeřřar
axêza serdar şîr sengîn sam
kerd be sê ḧîsse supay wêş temam
guzîn kerd pey wêş de hezar swar
merd muḧarîb ’ersey karzar
tewḧîd û yeqîn çenî bêdarî
bexşa be hersê řutbey serdarî
řewan bîn heryek çenî yek supa
berdişan hucûm heryek ne yek la
wêş ne kemîngah cageş bî me’lûm
wat be serdaran baweron hucûm
pes û pêş yek heryek pey supa
kerdişan yîrş heryek ne yek la
weytewr dan qerar ce beyn supa
herkes su’al kerd bwaçan ełła
ne ḧîn ḧerbe dûçar bîn be yek
«asma’alleErebî» zat celal ken meḧek
awerdin yîrş new şew deycûr
xêza heyahey ḧerbey şeř û şûr
merdan şikar çun şêr ne řeme
kerdin qetił û ’am supay mulheme
mulhemey le’în bêdar bî ce xaw
swar bî be esp bê zîn û liqaw
dest da be şimşêr ḧerbey xûnxarî
şikist da be tîp supay bêdarî
serdar ḧeqîq xêza ce kemîn
zana zebûn bî bêdarî û yeqîn
derdem kerd hełmet serdar ḧeqîq
yêrş berd beřûy mulhemey zendîq
xiroşa ce kîn çun şêr jyan
seyf tewekkul ne qed kerd ’uryan
nîşt ne sîlsîley supay kufir wikîn
řêzna tigirg seran be zemîn
mulheme weqtê ce wêş bî aga
dîş ke nemendin deyyar ne supa
dîş yek swar ne ḧerbey mesaf
dewr medo mehîb wêney qel’ey qaf
ẍuřřa be serdar mulhemey şeřřar
watiş: mer kênî ey merd xûnxar?!
serdar wat minim serdar ḧeqîq
nehengan ce bîm min bîyen ẍerîq
mer tonî serdar sułtan mecaz
perê pêşcengî bîyen dawxiwaz
watiş be serdar be zor şebxûn
to be namerdî supam kerdî tûn
bo îmşew herdû dû saḧêb řutbe
serf keym ce yek ser nûk ḧerbe
ney ’ersey xeter be canfişanî
ya ser mebexşî, ya ser mestay
mulhemey le’în weneş kerd hucûm
serf kerd ne serdar çend ḧerbey zelûm
nebî karger ḧerbey merd xam
serdar der leḧze ’uryan kerd semsam
da ne kiławxûd mulhey le’în
bî be dûpare, kefit ne řûy zemîn
her posen bazar da’îrey eflak
ga sułtan ne text, ga esîr xak
xulase ew şew ta weqit îşraq
supay zeng be şems ḧeqîq bîn îḧraq
espan bê saḧêb, xeyme bê deyyar
yekser kerd teqsîm serdar xûnxar
dił ne ’edawet ’edû bî sarêş
nîştin be demax herdû ne cay wêş
derleḧze serdar wezîr kamîl
’erzey fitûḧat wêşan kerd tekmîl
’erîzey teḧrîr daşan be çapar
çapar menziłan tey kerd be yełẍaz
ne we řoj aram, ne şewş ne xew
daxił bî ne qesir şehenşa be dew
pyabî ne esp sucde berd be şa
’erzeş teqdîm kerd, bosa qedemga
sadir bî ferman humayûn ce řûḧ
ḧeyat dan be nutiq ’erîzey fitûḧ
qetił mulheme şiksitey supa
fetiḧ dilêran şewqiş kerd îḧya
derleḧze ferma îḧsan be çapar
ẍerîq bî çapar ce duřiř û dînar
cewdima ko kerd ce zeř û gewher
ce xerqey nigîn kulah û kemer
be wecih xel’et şah dûr endêş
teslîm kerd be dest ser qurenay wêş