risîdin sirdar be ardugah
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
2 Xulek
724 Dîtin
be ře’î wezîr îşarey sedar
bî be urdûgah bîrûn ḧesar
her teref xeyme řeng řeng bî wepa
sardar pey ordûy wizîr bî řeha
ce xeymey wezîr pya bî ce zîn
cem bîn ce meclîs serdaran kîn
qehwey bo ’enber we qilyanewe
dewr mida herdem ne dîwanewe
ḧazir bî te’am, sifre bî guşad
wardişan te’am, xatir kerdin şad
cewdima zumrey serdaran sext
kerdin şekwey ḧał wêşan ce pay text
serdar wat: ye kar qeza û qederen
teqazay wicûd sînf beşeren
espab dinya mayeş firîben
ga meyl be fîraz ga pey neşîben
da’îrey dewran bê î’tîbaren
her satê sewdaş ce yek bazaren
ga nêş û ga noş, ga ’eyş û şadî
ga girye û keder, gahê azadî
zumrey ’arfan êd kerden meqbûl
ne şad bî be genc, ne řenc melûl
pena deym be zat danay cîhandar
înşa’ełła ’edû mebo xwar û zar
hem kerdiş beyan î’lanat şa;
mesrûr kerd be lutif seraser supa
mew’îzey serdar yawa be xîtam
serdar pey xeymey wêş kerdiş xeram
ew şew şîn ce xew supa ta seḧer
seḧer elxennas pêş yawa xeber
supay bê ḧedden ce qapîy ḧesar
menmano ne ’eyn xeymey bê şumar
supay sehmigîn îqlîm şer’en
piř xeyme û xerga direfiş û dîr’en
îsim supehdarş ’îşq macazen
saḧêb bezim û řezim, soz û gudazen