agah yaftin wizîr az amdin alxinas
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
5 Xulek
553 Dîtin
casûsan xeber berdin pey wezîr
ser dan ce serḧed supay bê nezîr
elxennas îsim serdar supa
saḧêb text û tac nigîn û kula
xeymeşan yekser dêz û deycuren
bał beydaẍiş ’eqreb destûren
elxennas firzend îblîs şûmen
serdar supay nefis zelûmen
wezîr çun şineft ne casûs xeber
ama ne lerze e’zaş seraser
derdem nwîsa pey sułtan řuq’e
awerd be qełem yekser waqî’e
me’lûm bo ce şah ye elxennasen
piř zat û huner supaş esasen
be wirûd ’erzey bendey can nîsar
perêm řewan ker supay bê şumar
min îste çenî mecme’ey supam
pey def’iş be emir to mekem qyam
çun to padşay ne řûy dû îqlîm
řezay min be ře’î, emir ton teslîm
pey muqabeley ew dêw merdûd
řewan ker emirit be efkar zûd
nameş kerd temhîr, siperd be řafî’
řafî’ sitanan be řa bî nafî’
cewdima nwîsa namey muxteser
be îqlîm wêş pey cem’ leşker
hem pey elxennas nwîsya name
namey xoş mezmûn şîrîn xîtame
mesmû’en supat cemen ce ḧudûd
nezanam çêşen ce amat meqsûd
meylit er be sułḧ, er ’ezimit cengen
ta zûd beyan key celam direngen
çun ce sayey feyz humayûn şa
her ca muqîmen mewcudey supa
meba be sehu nîran nîza’
bigêro quwet ce bêşey fîza’
hem to ce kirdar mebî peşîman
hem min xecałet mebûn ce sułtan
temam bî namey, be mor yawna
siperd be êlçî řewan bî ne řa
«sirî’aًErebî» êlçî yawa be ordû
ce beyn ordû peyda bî ẍilû
watşan êlçî ama ce wezîr
ełbette daro tewsye û teḧrîr
sehmî serhengan be te’cîl û tab
bîn ne bezim serdar be şîtab
nezdîk bî êlçî kerdin îstîqbał
ama nîşt ne bezim serdar fe’’al
serdar be te’zîm bikerdiş qyam
cewab da selam êlçî be îkiram
fermaş awerdin hem qehwe û qilyan
ta çîhrey êlçî xuřřem bî xendan
cewdima êlçî horêza ne cem
girtiş ne řûy dest ferman řeqem
serdar emirş kerd name sitanan
daşan be debîr ne sefḧey dîwan
cwab alxinas be wizîr
çun debîr nameş kerd mutale’e
kerdiş qîra’et bî musame’e
derdem emirş kerd serdar supa
watiş be debîr cewab ker înşa
watiş ’erîzem bawer be teḧrîr
’emewî cana xîtab be wezîr
ce amay supa ême be ḧuzûr
qelb munîrit kerdin teredûd
ce deryay efkar kerdebêt su’al
ce sułḧ û ne ceng, ce ḧał û eḧwal
esił me’mûrim be ferman şa
be her merz û bûm biřanim supa
ewweł be aştî bikerûn ’ubûr
er nebî aştî be ḧerbey fitûr
sa çun to wezîr paytext şahî
saḧêb merz û bûm text û kulahî
ełbet to cey ře’î mebî îttîfaq
ce deryay efkar nedarî nîfaq
kerem ker be lutif cûd û melaḧet
îqlîm pencem kerûn syaḧet
nameş kerd temhîr siperd be êlçî
bexşa be êlçî xel’et û xercî
êlçî řahî bî we bê xewf û bîm
yawa be ḧuzûr wezîr nedîm
nameş berawerd, siperd be wezîr
ferma nameşan awerd be teqrîr
ewza’ serdar ce êlçî persa
hem ne kem û bêş supay kînexwa
cewab da êlçî wat ey şehryar
serdar sehmigîn, supaş bêşumar
wezîr ne ẍûtey beḧir efkar bî
ne tedbîr duř umûr kar bî
naga sa’îy wêş ama be ḧuzûr
siperd be destiş namey ser we mor
wezîr be te’zîm ferman sułtan
be meḧiz qyam fermaş bwanan
kerdin qîra’et şîqqey sułtanî
xîtab be wezîr be mîhrebanî
’erzey bendegît be ême yawa
ce ordûy ’edû êmeş kerd aga
quwey îdrakit min kerden memnûn
be wirûd ferman we bê çend û çûn
swar ber esp nepey neng û nam
çenî mewcûdey supay wêt temam
nebo aramit ne řoj û ne şew
binîş ne ḧidûd muqabîl ew
mebada ce kar bawerî sistî
fitûn ’edû kero pêş destî
dimay qîra’et nutiq humayûn
ferma berşan xeyme be hamûn
hem be serhengan kirya îşaret
ḧazir bî supay şehir cesaret
çenî supay wêş zumrey serhengan
sware medran ḧazir ce meydan
wezîr swar bî çenî mehweşan
supa ce ’eqeb kêşa direfşan
ce kenar şehir wezîr dana
ferma be supa xeyme ken wepa
wepa bî yekser xeymey řengawřeng
sakin bî supay emîr û serheng
dimay çend hefte serhengan dûr
ba supay wêşan aman be ḧuzûr
cewdima be esp swar bî wezîr
dan ne tepił kûs keřena û feqîr
řahî bî çenî supay bê ḧîsab
yawa be ḧidûd be te’cîl û tab
yek firsexê dûr ce supay ’edû
be emirş xeyme wepa kerd urdû
ateş da be top selam derleḧze
îqlîm wicûd ama nelerze
ce teref serdar supay kînexwa
cewab selam be top kerd eda
xor ne burc ẍerb ’edem kerd menził
ne herdû ordû berşî qerewł
supay terefeyn şîn ne řextixiwab
ta ne subiḧ şerq berşî aftab