şa’îrêkim

pîrejnê bam... le mindałdanî janî řiq
mindałêkî gêřim bwaye
weku nuqłî beratî xem.
pênûsekan..
bedem řojname zerdekan
wênekemyan dekird be pend
pizîşkekan... em minałe sawayemyan le xom desend
keçî emřo, şa’îrêkim... le mindałdanî mêşkî dił
şi’rî birsî û tênûm debê
pênûse çaw řijawekan... nanê naden be wişey guł
kwêr û mirdûn
boye ta dê... beçke giřî hełçûm debê
*
cumbazê bam, le ser petî yarî şewa
çawî bazdanim kwêr baye
henasey xem, çepłey sersam
nek řojname... hezaran kes le naw diłî xoyan denam
keçî emřo, şa’îrêkim
cumbazî petî azarim
kilîlî cê y nanim laye
hawarî çewsawekanî, nałey şarim
bełam lenaw govarekan.
basî ême, zamî ême, nûzey naye
*
zigtêrê bam... basim dekira
hîtlerê bam, supasim dekira
dyare minîş şa’îrêkim
le naw dengî agirînma... xołemêşim
şa’îrêkim... le naw lûley tifengêka
henasey jînî řizgarî, heł dekêşim.
(le řojnamekanî xoman, le êstigekanî bêgane zor şitim lêk dedayewe û be berawird nedegeyşte toskałî meseley ême ke le bendîxane dest besteyn..hemû kes le seryana, hełdedenê...}
20/9/1977