amdin lîl be timaşay baẍ û arziwî dîdar micnun kirdin û name nuştin
Li pirtûka:
Leyla û Mecnûn
Berhema:
Xanayê Qubadî (1704-1778)
12 Xulek
1075 Dîtin
nîzamî ce qewł danay beẍdadî
wey tewre řêjan terḧ ustadî
çun namey leylê cwaw pey mecnûn
yawa pêş ce lutif leylê bî memnûn
mewt eda û bab, xałoy cewanmerd
řuxsar qeys kerd wek xezan zerd
namey diłsozî û de’wetî leylê
bî we teselîy xatirş xeylê
řahî bî we řa pey kohî tûban
be wanay eş’ar şêwey meḧbûban
řojê ke heway peřnyanî poş
xiłxał fełek kerde bî ne goş
sitaran wêney sîmab ce ew serf
ce tab xurşîd řewşen bî şingerf
mecnûn diłřêş çun cîwey sîmab
ama we piřtab pey wismey xîzab
ama we tûban, koy ẍezał xûyan
be wanay eş’ar, we lebeyk gûyan
dest mał ne çem ḧey da be lawe
çun mang ne goşey hewr syawe
dîş xeyme û xergah ebrêşem tenaf
mexsûsen leylê sosenî kełaf
we řesim ’ereb nîşte nîm nîgah
ce pişt perde piřişkenc xergah
mayîlen we seyr ew baẍ û bostan
pey tecdîd dił, dîdeyî dostan
lwa we goşey baẍ îrem tewr
nîşt wêney cilûs şahan řûy dewr
leylê şinasa ce dûr, qeys wêł
ce sara û ce baẍ pey leyl eragêł
wêney perdey guł kêşa we sara
xak kerd we serîr sułtan dara
şikofe xende kerd we dirextan
wêney sikey zeř, řûyî nîkbextan
laley le’il surx çenî ew guł zerd
ce ’alem ’îlim dû řeng berpa kerd
ce berg fûyî î baẍ û bustan
ama we awaz sed hezar destan
sîrabî sebze nebatî newxêz
ce lûlû’î teř zumřûd engêz
lale ce wereq fişana şingerf
ałş qeraw çun syay xezef
benewşe du zułf be ew dirazî
westen we jêr paş pey weqit bazî
ẍunçe kemerbend îstiwar mekerd
peykankeşîy tîr ce řûy ’ar mekerd
guł çun îstebreq bafit ḧerîrî
bad kefit ne xeyał goşwaregîrî
nîlûfeř ce şewq xurşîd gułřeng
siper west we řûy deryaçe pey ceng
sunbuł ser nafey muşkî baz kerde
guł dest tełeb lêş diraz kerde
şimşad miskîn ce’d zułf şane kerd
gułnar tehyey terḧ enar dane kerd
demaẍ nergis bî ateşîn tab
çun tebzedegan ew bî coyay ab
xurşîd çu qetrey badey xusrewan
kêşa xun ce řeg laley erẍewan
hełałe û semen, şeqayeq, nesrîn
řuxsar meşoran cew çeşmey şîrîn
guł ewweł be tirs dîde mekerd baz
haw şikiłş nedya çopî mekerd waz
sosen kêşa bî zibanş çun têẍ
ce te’sîr soz giryey tîre mêẍ
xyaban baẍ çun çeşmey kewser
şaxey şetawan mama seranser
çemenan sersewz aw ne řûş efşan
çun nuqrey zimřud lał bedexşan
gułałan gah gah new cogey sîmîn
meşoran çun ḧor celay cam cemîn
xetmî û guł mêxek, lewlaw û şeşpeř
zenbeq çenî yas jałe bo ’enber
řêḧan guł guław sewł weş bo hem
qerenful têraw ’ebbas lale çem
murẍan zeban guşade çun zaẍ
temam newaxwan îştyaq baẍ
çun tûtî, tezerû, tawis û şinqař
kebik xêz û kem řeg şahoy têz minqař
sipî çinaran serkêşan we ewc
ce şinoy nesîm be hem medan mewc
seru, narwen, şimşad çenî kac
sinewber û bîd dił mekerd heřac
ce murekebat dirextan berz
bîdmuşk, mirwar, meyu biłend terz
bîyen we seywan serçeşmey çemen
ferş museteḧ baẍ, wenewşey semen
medrewşa jałey ebir beharî
ce şaxey gułan wêney mirwarî
duř[a]c û kebik û teyhû û qenarî
sar û çilçile, pepû û pasarî
cuře û kuřkuře û qaj, sya zaẍ
jaẍçe, perestû, torimte û kelaẍ
qumrî û kebûter, faxter û taq taq
lek lek , şahîn, çerx dû çem zaq
bûm û şiturmurẍ, urdek çenî qaz
kerseř û kułeng, bet û sipî baz
murẍan awî û beřî û hewa’î
ḧukim tebî’et pey xudnima’î
hezar destan, destey bułbułan
mewanan awaz ne şaxey gułan
leyl ce gird xaster be şoxî şêwe
cey humayûn fesił feř ḧeq pêwe
ce xeyme û xergay xemkedey ḧezîn
amawe seyran gułbaxçey guzîn
çenî çend lu’bet ḧorî terz û tewr
e’rab kinaçan şîrîn řûy dewr
be şadî û sirûr aman û gułzar
ahuwan nafe awerd ne bazař
’etir řeyaḧîn şêwey gułałan
berdin be yeẍma û tarac û tałan
menzûrş nebî leyl gułzar
beł dîdar dost namîyey nazar
bişo we cayê yek penagahê
ce soz derûn bikêşe ahê
daẍ dûrîy qeys, sergerdanî ew
bawero be yad newcewanîy ew
be girye û zarî, endûh derûn
çenî esir şor ber kero bîrûn
leylê çenî ew newtûł nemaman
satê cew gułzar gêła xeraman
nexłisitanê bî xurmayîy biłend
cew kenarî baẍ banûy ercumend
be ’uzirxiwahî pey îstiraḧet
şî bew nexłisitan satê bo řaḧet
lwawe sayey serbiłend serwê
tenha nîşt ḧezîn wêney tezerwê
we bałayê sebiz tekyeda çun guł
ce teh derûn nała çun bułbuł
wat ey mîhreban yar wefadar
mewafq be min be ẍem sizawar
ey cwan seru wêney cewanmerd
ce min diłgerimter be henase serd
qedem řenceker wey tewre baẍê
ber ker ce diłim çend derd û daẍê
danîşî çenîm dił yawo murad
min çun narewend to seru azad
mezanom nunîst ? ce dił feraẍim
bê perwa ce seyr seraw û baẍim
axir be ziban ce nîkûnamî
kem kem mekyanî we min peyamî
leylê bîm sabiq we to bîm meftûn
hezar bar ce to bêşter bîm mecnûn
syater ce to syastarem
şîftey ’eşqim bê dewa û çarem
herçend to fêşter nîşaney derdî
axir ne çun min jinim to merdî
ce gird şêwey ’eşq çust û çalakî
laqeyd ce merdum bê perwa û bakî
çun [min] şikencey hamser û babo
nedarî qebûł meşî her ca bo
miskîn û bêkes bê yar û hamdem
wekê byanom daẍ û derd û ẍem
metersom ce des bê xurd û xamî
beyom bêgane ce nîkûnamî
ga maçom zehrê qatił binoşim
beheşt we gunay dozex bifroşim
cey dû ’elaqe qewî û zeberdest
ce keşankeşim uftade û sermest
ce yek la endû cergey ẍerîban
ce yek la endû û taney řeqîban
ne cur’et çenî şewher bistêzom
ne zat ce setwet pider bugrêzom
’eşq medom sitêz ce bêqerarî
cey zaẍ û zeẍen kerom ferarî
çun kebik derî bişom we kosar
’eqiłim mewaço mebî nigûnsar
şahîn ce kebken qewîter xeylê
nengen we şi’ûn xêłxaney leylê
jin er bebir û şêr bigêro be goş
nemebo we merd her jinen xemnoş
tewanam nîyen ce î bar xem
wêm kerom xełas çenet bom hamdem
xolase dił û cergim[ne] honen
nimez eḧwałat mecnûnim çonen
eş’ar ce dehan leyl nekerd perwaz
ce řaguzerş ber’ama awaz
bwane eş’ar çun duřî meknûn
qeys qurbanît ya nîha mecnûn
wat ey perdedar îsłaḧ karim
umêdim to bo we perdedarim
mecnûn ce girdab emwac honen
leyl we ḧesabat kar ew çonen
mecnûn we neşter ciger mexraşo
leylê canmek ce kê metraşo
mecnûn be xedeng xar ẍem suften
leylê ce řûy kam nazbałş xuften
mecnûn be hezar newḧe menało
leylê ce nîşat xoşî mekało
mecnûn kemerbend nyaziş benden
leylê ce řûy leb wekê naz xenden
mecnûn dił’azar derd nařeḧet
leylê wekê bo meyl webê zeḧmet
leylê çun suheyl ce toy ’emmarî
mecnûn çun fełek ce perdedarî
leylê ce gile serbend kerden baz
mecnûn derwazey gile kerden waz
leylê ce xiroş çeng nyane wer
mecnûn çun řûbab çengiş hane se
leylê çun xurşîd sub cehan efroz
mecnûn be wêney şem’ beden soz
leylê megêło baẍ ce naw baẍ
mecnûn meřêjo daẍ we ban daẍ
leylê çun qemer ce řewşenî çust
mecnûn çun qeseb ne muqabił şust
leylê ce dirext guł nîşanyen
mecnûn be eş’ar duř efşanîyen
leylê çun watey perî weşê bî
mecnûn ḧîkayet gird ateşê bî
leylê çun semen xezan neyawa
mecnûn çun çemen xezan pê yawa
leylê çun nesîm subiḧ meyo we pêş
mecnûn çun çiraẍ xamoş meyo lêş
leylê be sed naz ziłf şanan be doş
mecnûn be wefaş ḧełqey duř ne goş
leylê be sûbiḧ cam cannewazî
mecnûn pey sema’ ce xerqebazî
leylê ce derûn perend medoza
mecnûn ce bîrûn sipend mesoza
leylê wêney guł şikoftey xoşřo
mecnûn be guław dîde meşoro
leylê sya ziłf ser mekerd şane
mecnûn ce esrîn gişt tesbêḧ dane
leylê camê mey muşk bo ce dest
mecnûn ne ce mey ce boy leylê mest
mecnûn qani’ bî ce leyl we boyê
leyl řazî be qeys be cistucoyê
ce tirs teftîş taney řefîqan
mesazan ce dûr wêney ẍerîban
qeys medya we leyl ḧesretiş mewerd
leyl medya we qeys her newḧe mekerd
ta çerx horêza we î behane
î yek nezerîş şî we myane
leylê çun ce qeys ejnî î ẍezel
girawe be esir çepok da ne tel
cew serubenan û seyr bostanî
medya be ewan yek ce nehanî
leyl ce dûrîy qeys dîde biryanen
çenî dost wêş çend mîhrebanen
ce dimay î řaz qeys şî be seḧra
dił piř ce hûnaw demaẍ piř sefra
leyl çun sehî seru ce ew çemenga
çenî hamřahan lwa we xerga
ew şexis řazdar ce myan baẍ
girte bî we dest pênc ẍurab zaẍ
ama we menził çenî ẍuraban
horgirtiş leylê terge şitaban
şana ce zaẍan kerdişan bêrûn
îbin selam wat çêşen ce derûn
watiş bedîwminen sewtiş xeraben
mayey tefreqey beyn eḧbaben
wat ce kot zanan î beḧis û beyan
wat ce amozam qeys diłbiryan
şehzadey şehîr şêx ’amîrî
be mezmûn şox şî’ir û şa’îrî
her wextê zaẍan yabwo we’eyn
xîtabiş kerden be«ẍurabu albînErebî»
îbnuselam wat: we bê derd û ẍem
mebo min řûy qeys bwînom we çem
kenîz řazdar řaziş nepoşa
watiş leyl pey qeys derûnş coşa
ce îbnusselam siř bî aşkar
řojê swar bî be ’ezim şikar
lwa we seḧray sebiz û merẍuzar
yawa be ew qeys xestey xwar û zar
dîş polê ẍezał wiḧûş û tyûr
ce min ce etraf mecnûn ẍeyûr
mewano eş’ar be eseḧ kelam
îbnûselam şî be ew kerd selam
xîtab kerd we qeys edîb dana
weytewre mezmûn î dû beyt wana
dêwane ta key ma’îl we leylî
mer ḧeq wêney leyl nesazan meylî
seyḧey sitêz da qeys dêwane
persa ce yaran be ew nişane
watin î swar îbin selamen
hamser leylî şîrîn kelamen
qeys ’amîrî be lehce řîşxend
wat be gyan wêt mederot sewgend
her şew wer ce subiḧ bomenî neboş
mew şarî we dest şemamey lîmoş
sîne be sîne şan we lay şanş
ser we řûy gîsûy ’enber’efşanş
mederî bûse we le’il lebiş
xet û xał û zinc, sêwî ẍebẍebiş
duşaxey bazûş mewzî we gerden
çenî ḧeytaran îstîma’ kerden
ew îbnusselam xende kerd xeylê
watiş weytewrem min çenî leylê
watiş dirot wat leyl beyn dirusten
ce to bêzaren mecnûn peresten
ew îbnuselam kêşa xecałet
ser wist we payîn teẍîyr da ḧałet
wat herze guftar bê ’îffet kelam
leylit weytewr kerd we řîsway ’am
mer nimetersî ce fîtney zeman
ce qehir qazî qezay to aman
ẍefłet zeman medero be dest
sitwet e’wan xelîfey sermest
ew ’ebdulmelîk ferzend merwan
ce fewq îslam ew fermanřewan
bişnewo ce to î qubiḧ usaf
ḧełqit mewşaro be ḧełqey tenaf
qeys dił’azar wat îbnuselam
qesem we celal «milku al’ilamErebî»
min ejnîm ce qewł murẍan hewa
sê řojî menden ew fermanřewa
ser menêw nesay seng syay xak
meşo we dîwan ferd tenyay tak
mebo we řehîn bedîy e’małş
kafir bezeyîş meyo we ḧałş
îbnuselam êd şineft ce qeys
gêławe dima we bê ḧeys û beys
şî we xergay wêş bê fikir û xeyał
ce dimay sê řoj awerdin hewał
ew ’ebdulmelîk şah emewî
dujmin sersext al ’elewî
berşî ce dinya bê sida û seyaḧ
gyanş kird teslîm «qabiz alٲrwaḧErebî»
îbnuselam mat ce watey mecnûn
cew pakîy zemîr esrar meknûn
xanaNasnava edebî xoş be ḧał ’aşiqan ḧeq
besîren be nûr tecełay mutłeq