amdin madir û pidir qîs be dîdin micnun û fut ayşan
Li pirtûka:
Leyla û Mecnûn
Berhema:
Xanayê Qubadî (1704-1778)
3 Xulek
825 Dîtin
şeyda’î mecnûn bî we awaze
eda û bab kerden dax dił taze
melûḧ û selîm ’amîrî û mader
îxwan, exewat, xwaher û birader
swar bîn we pişt cemazey řehwar
řahî bîn řojê ce wadey êwar
tey kerden řahan badyey ẍerîb
be ẍem û xuse û endûhî ḧebîb
dîn ne dameney tubad û suban
piřen ce wiḧûş beř û byaban
gewezin û gurg, ahû, şêr û bor
piłing û xergoş, murẍ û mar û mor
ewende cem bîyen be tacîl û taw
załey zamdaran zû mebo we aw
ce dû sida dan, qeys ama we hoş
peřagende kerd tyûr û wiḧoş
şîn we lay miştê îstixiwan û post
xałî ce girdîn małamał ce dost
be zarî û şîwen wêney merdenş
dest îştyaq kerden gerdinş
bosan dîde û dem bê xurd û xawiş
perirsan ce taqet tewana û tawiş
wat nîyen ce lam ẍeyr ce ’eşq leyl
eda û bab ce xem derûn kerdin keyl
herçî nesîḧet, herçî diłdarî
kerdişan, derdiş fêşter bî karî
ew şo ta seḧer nîştin laşewe
pałdan we bałîn seng taşewe
seḧer hurêzan pey dîd bosî
wida’ kerdişan be sed me’yûsî
gêłano dima herde we herde
lwan we yane çun azîz merde
ce derd fîraq ferzend cwan
melûḧ řoj be řoj mebî natewan
axir ce hîcran ferzend şîrîn
gyanş teslîm kerd we can aferîn
ce dimay baboy mu’ella sîfat
mader û xałoy qeys kerden wefat
î hewał yawa we qeys bedbext
derdiş bî giran qetre da be cext
ama we ser xak giłkoy eda û bab
dił û cerg řêş xaster kerd kebab
be soz derûn, be awaz berz
be eş’ar şox şîrîn tewr û terz
xało û eda û bab be dił melawna
syaseng be soz çun mom metawna
îxwan, exewat, bira û xwaheran
eqreba û xwêşan, hawsa û hawseran
şîn ne dewr ew be şîn û zarî
esrîn meřêzan ce bêqerarî
zyadter ce gişt pey wêłîy mecnûn
qeys ce ewan bî ferawan memnûn
axir horêza tund û şitaban
řû nya we řay çoł û byaban
dest kerd be werdey gyay keş û ko
ne cay ẍezay xas şahî başko
bira û xwaheran me’yûs şîne pes
dest te’esuf nyan ne řûy des
xane pey gird kes dinya fanîyen
dinya pey hîç kes cay wefa nîyen
du’ay xêrit bo îman selamet
bişî we ’uqba we bê melamet