îmaretî ḧesenkêf

milûkî em îmarete, be řîwayetî şerefname, netewey xanedanî eyûbîye. ewweł emîrî, melîk silêman buwe û tesadufî dewrî cengîzî kirduwe. ke wa bû, ebê em îmarete le 736 h.da damezrabê. melîk miḧemedî kuřî melîk silêman legeł muẍul û ḧikûmetî êranda başî řabwarduwe. melîk eşrefî kuřezay melîk miḧemed, tesadufî dewrî teymûrî lengî kirduwe û le mardîn çote [lay] teymûr û ḧîmayey ewî qebûł kirduwe. melîk xelîlî kuřî, legeł şahřuxî kuřî teymûrda mudaray kirduwe. melîk xelef (= ebu elseyfeyn)y kuřî melîk xelîl zor becerg û aza buwe û beramber be îstîlay aq qoyonlûy ḧesenkêf, merdane mudafe’ey kirduwe, bełam be xyanetî yekê le umeray, qełake kewtote des dujmin û em îmarete be muweqetî le naw çuwe.

melîk xelîl naw emîrêkî em xanedane, le dway îstîlay aq qoyonlû řaykirdibuwe ḧemma, le weqtêkda ke umeray aq qoyonlû bo textî sełtenet le beynî xoyana kewtibûne şeřewe, em melîk xelîle hatewe kurdistan û be mu’awenetî ’eşayrewe, si’irdî zewt kird. le dwayîda ḧesenkêfîşî sendewe û îmaretekey serlenwê damezrandewe.

melîk xelîl herçend legeł xanedanî sefewîda munasebet û xizmayetîşî peya kird, bełam le şeřî şah îsma’îl řizgarî nebû û sê sał le tewrêz ḧepis kira û le dway şeřî çałdêran, xoy necat da û hatewe ser îmaretekey û tabî’î ’usmanî bû û muddetêk îmaretekey be des neteweyewe dewamî kird û le dwayîda le teřef ḧikûmetî ’usmanîyewe le naw bira.