heway zimistan xeman betałen
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
983 Dîtin
heway zimistan xeman betałen
werwî herdî derd derûn xałxałen
hajey tafî saf şetawgey şadî
sub meyo ne goş hoşî azadî
boy şinoy şinyay tay çinûrî şewq
mido ne demax piř perdaxî zewq
keyfim da weşweş deste westey guł
ne goşey kiław, ne pay deştî dił
nîşaney newzoz wadey weharen
ya neş’ey amay namey nîgaren
yanê: azîzim ye namey to bo
ye řeşḧey ḧeyat ser xamey to bo
ey esrînî germ tawtawe řasen
ey diłey pey min hûnawe řasen
bîyen ey wefa, wey îstîẍnayît
ey germîy mobet, wey aşnayît
taqîyen yaran, ya xawim dîyen
ce bedbextîy wêm yawerim nîyen
řuxsarê, wextê mesqeł mida wêş
we şinoy parêz xeyał mebî řêş
esrîn cergiş den we ser nêşeda
çenîş dił aman, aman pêşeda
ew diłey wêney peřey guł bêgerd
hey xem, hey namerd, çenît melûl kerd
ewsa îstîẍna û qîn we hem mawerd
însan bêperwa gyan teslîm mekerd
îse bo ey taw hers çun seyle
ey îltîfate û ey wefa û meyle
ey diłey nazk xestey xemane
goşder û bijnew, emcar bimane