wefay çerxî çep řas bê tan û pon
Li pirtûka:
Dîwanî Mewlewî
Berhema:
Mewlewî (1806-1882)
1 Xulek
748 Dîtin
wefay çerxî çep, řas bê tan û pon
cefa bêpayan, derdîser bêşon
bedî nîkîyen, nîkî bednamî
famay şêtîyen, şêtî piřfamî
saray hîdayet tarîk mewînûn
řay necat yekcar barîk mewînûn
nałem ney asa ałem girt ne wer
şîşey mey pemet ne goş berawer
ce to qehqehe, ce pyałe mey
ce saqî ha dey, ce ême ba bey
mełła ce kesret lewḧiş bo sade
mensûx nezano ḧełałîy bade
zahîd mayey hoş hîç nemano pêş
peşêw bo teqwaş çun mêzerey wêş
min newun we teng nefamîyewe
wêm bidewn we des bednamîyewe
dêwanan asa bicoşûnewe
bełagel çun mey binoşûnewe
şerarey mestîy mey berşom ne dił
wew çiraxewe yawun we menził