le serdemî xoya řabwardinî mangî řemezan le...

le serdemî xoya řabwardinî mangî řemezan le suleymanî core řabwardinêk bû, řadyo û emla û ewla hîç nebû. yekêk lew řabwardinane ewe bû le sałanî 1930 be dwawe ta řadyo dahat.

mela mistefay ḧacî mela řesûł le mizgewtekey xoya «mizgewtî başçaweş» lepaş ewe ke her kese le małî xoya berbangî ekirdewe ehat bo mizgewt, nwêjî terawîḧ becema’et ekira. le ḧucrekeda semawer tê exra û xełk eçûne ewê da’enîştin, le derewey geřekîş her ehatin, mela mistefa destî ekird be xwêndinewey «fituḧatî şam» řiste řiste ’erebîyekey exwêndewe her xêra eykirdewe be kurdî tam û lezetêkî tirî edaye, her kesêk şewêk bihataye îtir diłî ne’ehat becêy bêłê ke egeyşte şwênî şeř û serkewtinî esḧabeyek dengî «hey bawkekem hem małekem» le xełkewe berz ebowe, her le beynî maweyekda ewesta pişûyekî eda û eyut ’ewlxalq ça tê ke, şekir û çaş xełkeke eyanhêna, eger her şewê nebuwaye mela mistefa xoy eynard eyanhêna, biraym xan ew serdeme heřetî bû, ke ehat da’enîşt eyut: a biçin de kełła şekir û hoqeyek ça bênin, bem core řayan’ebward heta parşêw, ke sełay parşêw, ekira her kese eçowe bo małî xoy.

mela tofîqî ’etar małekeyan letenîştî mizgewtekewe bû, ewîş le małekey xoya em kořey pêkewe ena, jûrekan hemû piř ebûn, çayekî bo da’enan, beyn beynîş ça egêřa be ’alemekeda mesrefî şekir û ça û cigere hemûy leser xoy bû, ewîş her fituḧatî waqdî exwêndewe, car carîş ẍezay bedir û ḧuteynî exwêndewe. ew ta parşêw da’enîşt, be ḧisabî îmřo ebû be se’at de û yanze dwayî pê ehêna û xełkeke hełestan, ewî hewesî buwaye û xewî nehataye lewêwe eçuwe kořekey mela mistefawe, çunke ew germ bû ta parşêw.