qîblem sizam werd
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
729 Dîtin
qîblem sizam werd ...
çend sał ce zułimit cewr û sizam werd
ce daxt kêşam henasan serd
ce řenicit noşam zûxawan derd
çend badey ḧesret perê to noşam
çend berg meynet perê to poşam
çend esir bêsûd perê to řêzam
çend ئاە piřdûd ce sîne xêzam
qirçey siftey cerg mejneftim we goş
meda ne bînîm wêney biryan boş
qetrey zûx zam, cur’ey camim bê
řeşḧey hûn dił, çûn mudamim bê
çend tane ejînim ce bêgane û xwêş
sed tif û ne’let ce bedxiway bedkêş
qews řiqîban tîrne cergim berd
têx ḧesûdan cestem hûnîn kerd
til medam we sukin zam sextewe
we kerdey bêsûç, keçî bextewe
bełam meyl tom sat ce sat bêş bî
bê to noş ce lam ser mewday nêş bî
zułf piřçînit tar erwam bî
qews qetranit qîble nimam bî
qedit we qyam, qed qametim bî
mobetit, mêḧrab îmametim bî
azîz, çend perê to derd dił kem
çend we hûn dił, bezimit guł guł kem
çend dûy henasem we seywanit kem
çend berq ahim pasewanit kem
çend esir we taw awpaş řat kem
çend gyan we qurban bejin bałat kem
ḧeqim we desten gyan weneyrit bam
hestî we qurban sewałxeyrit bam
ferhad meftûn, bîdî gêłit bam
mecnûn ’ebdał, pos we pêłit bam
erto şemenî, min perwanet bam
daym pasewan dewr yanet bam
pey çêş?, min ẍułam qutib řebbanîm
canifday nayb ẍews geylanîm
er gerden xemen ce bardeynim
nimek perwerdey sułtan ḧuseynim
qîblekem aro ce jin qurbanen
pey pabos to cejnanem gyanen
er çûn bêmeylan cefakarît kerd
er çûn diłserdan dił’azarît kerd
azarit şadî, cefat sefamen
řenicit wêney genc, derdit şifamen
zułim to ’edłen, bendit azadî
zułmetit nûren, ẍemit diłşadî
sa bo bew peyman û yerdey werîn
biřes we firyay xestey diłḧezîn
bibexşem we ’işq diłpakî pakan
ya we ئاە serd xatir xemnakan
cestet bê melal, dewrit we kam bo
ce dîn û dinya walat meqam bo