le wełamî cenabî «şêx miḧmiditahir»da witûme
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
717 Dîtin
nameket pey nûr dîde û dił yawa
hefit perdey zułmet etwar şikawa
zeřře zeřřem kerd we serherdanda
çenî gêcyay lûl sextî derdanda
lûl werdim pêçyam, bîm we tozugerd
řeşebay nikbet gerdim ber bad kerd
cewsizay meynet, haje witofeda
cewkiłpey derûn ters wixofeda
zeřřat hestîm hordara hana
goşdam nameket we sozmewana
ferma bêt bew lefiz řoḧ’engêzewe
bew řaz tesnîm beheştibêzewe
bew meyl piřisdiq sefa xêzewe
bew lutif waran řeḧmet řêzewe:
«toy derûn we dîn dîdet muştaqen
ce tasey dûrît taqetim taqen
er biřwat nîyen dêwaney serşêt
bipers ḧał min ce derûn wêt»
fidat bam, sa min qîmetim çêşen
pêse derûnit perê min řêşen
to firîştey pak lahût mawanî
we ewc meqam e’la yawanî
derûnit baẍçey her heşt beheşten
baran řeḧmet ḧeq pêda weşten
ce bînit metle’ enwar ẍeyben
qelbit ne cay ’erş zat lareyben
sînet xezaney siřiř qedîmen
zibanit kilîd ’etay ’emîmen
nazkît gire û ce sefwet berden
sefat tecellay kerîm ’am kerden
min derûn dozex nayrey dûrîm
gîrodey azaw derd mehcûrîm
meḧrûmî lawda řîşey şadîm kend
kiłpey me’yosî bûł weyanem şend
bedbextî, hestîm gird dawetałan
bîm we serkone û taney minałan
namedî syaş wist ne endamim
nasorî cagirt neřîşey zamim
awayîm wêran, weşîm zigarî
xendem zarîyen, keyfim xembarî
gułim nêş xar toy diłişkafen
qametim kemer, esrînim tafen
îden şerḧî ḧał xembarekey wêt
hey sed car gyanim we sergerd řêt
bełam bîna’îm, dînim, îmanim
hêzim, twanam, řoḧim, jyanim
teqsîrim çêş bî weytewr day sizam?
sed car gyan weneyr bejin bałat bam
min xo ře wiyey řesim wefadarîm bî
daway řutbey xas xizmetkarîm bî
mestîm ce badet řoy elestî bî
dirûstîm neřûy ḧeqperestî bî
toy derûn ẍeyr to kes nebê têşda
dirêx kon ew çem kaş medyay pêşda
mezanay, medyay, mejneftî nałem
bełam beze’ît nama we tałem