arezûmendîm ce ḧed wiyerden
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
4520 Dîtin
arezûmendîm ce ḧed wiyerden
firawan xeylê tasey tom kerden
qîblem bew eḧed bêhemtay ferden
sewgend yekêwen çenî tom werden
fikir û xeyałan weswasey wefat
daym ne diłen ne řûy ser besat
şewan ta we řo fikirim ce laten
řoḧî řewanim ne xakî paten
qałbim bêřoḧ, eřwam nemenden
min danî ḧeyat zîndegîm kenden
namit çûn ewrad subiḧ û êwaran
mwanûş we germ ne pay dîwaran
çemim çûn şabaz wêłî şikar bo
daym bał perwaz ne ser dyar bo
ce serqełaNava taybetwe megêłûn pey to
dek dîdem her dû sed car fidêt bo
aman, hey azîz bînayî çawan!
gilem hen ce to xeylê firawan
yanê çêş meylit feramoş kerden
mer badet ne cam bêşertî werden?
werne yanê çêş ne caran carê
xeber nepersî ce řawyarê?
umêdim êden, amanen aman!
cey fêşter nasor newzî zaman
eḧwałî ḧałat şerit û wefaket
bikyane perêm tobî xudaket!
ne sał û ne mah, ne hefte ne şew
ne satê aram, ne deqîqe xew
nimeşom ne çem, dîdem, ne dûrît
her êd mwanûn: ax ce mehcûrît!
îse kê taqet dûrî to daro?
dek berqî ẍezeb we cesem waro!
be sergerdit bam, eřwaḧekey wêm!
cwabî serîḧ bikyane perêm...