îḧya nebûn sa neşûn merden
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
2224 Dîtin
îḧya nebûn, sa neşûn merden
namekeş aman, gileyîş kerden
qasd! şo we lay ew newnemame
çun yaway, pêşder ey cwaw name
cew eskencebîn des suruşteket
yanê: namekey zêba û zuşteket
be badekey wêt cam cam werdewe
tałî sefray derd dûrîş berdewe
fermabêt bew lefiz şeker řazewe
ga ce řûy ’îtab, ga we nazewe:
ne wextî hîcran wîda’it fama
ne we şemałda peyamit ama
deysa hurêze, xemyarekey wêm
bo şad ber we dîn dîdarekey wêm
to tîrekey wêt, we zamdarîy wêm
to bêbakîy wêt, burdebarîy wêm
ew wext payî kaw herdî dił tem bo
esasey dûrîy azîzan cem bo
çon nebřyo tay řiştey sebûrî?
goş çon wêş mido we qisey dûrî?
zwan çon taqet hîmmet wazîşen?
dîde çon taqet şon dyayîşen?
gêc mido derûn çenî nêş, aman!
bełam hey serxêł new tûł nemaman
çon yaray nefes berawerdemen?
soziş we şemał řewankerdemen?
metersû ce ḧîfiz teqrîrî eḧwał,
soço xezaney xeyałî şemał
min xo şew û řo arezûy tomen
perê dîdenit nezir û fitomen
bełam, yen we yad bałakey towe
dewrim dan we dewr sara û serkowe
boy bałat herzan we deşt û derdan
nimez řay lay tom wekam guzerdan
giley to wey tewr, ḧałet wey neseq
dûrîçit wey řeng, xuda to we ḧeq!