geřanewe bo beẍda

dełên carêk «xidraẍay qizłice» nokerêkî nardote lay aẍayekî tir, ke way pê biłê û away tê bigeyene û cwabim bo bênewe. noker dêtewe, cwabekey hîç fiřî be ser sipardewe nîye.

- kuře ewe çîye?

- aẍa le řêge fikirim kirdewe, fermayştekanit zor bêtam bûn! bo xom emem gut û ewem tê geyand; ewîş em cwabey dawyewe!

lêm nepirsî to çit gut; bełam bebê xwaḧafîzî hatmewe beẍda. çûme małekey ḧeme.

lew kate le małekey kerkûk bûm, tûşî «seyîd eḧmedî seyîd teha» hatim.

- kake! çon wa debê? ême biray komełeyn. min çend dêm heye. hîç polîsêk natwanê bête miłkî min. bişzanin natwanin bitgirin. qur’an be ḧeqit be saḧîbit! sibey degeł xomit debem.

- kak seyîd eḧmed! pilîkopîyek heye ba degeł xomî bênim; ke dêy to bo şitî wa denałê û zorîş xizmete be kurd.

- beser çaw, ewîşt bo dademezrênim. sibey se’at heşt were be tirombîl deçîn maşên û kelupelit hełdegrîn; bełam neçî peşîman byewe! le pyawî bedqewl tûřem!

le biraymim pirsî, gutî: zor başe. sibey her se’at ḧewt geyme utêl. heyhû seyîd eḧmed demêke řoyştuwe! êsta û êstaş nemdîtewe.

řojêk mamosta «’elî ḧemed»y cîran û xanexwêm hate lam. derbarey markisîstîyewe dedwa û hêndêk piłîxanof miłîxanofî têdabû; ke deygut fiłan řîc’î û fiłan teqeddumî bû. min tê nagem û her dełêm bełê. lepiř gutî: min zorim murtecî’ naxoş dewê.

- bełê bełê! murtecî’ zor segbabe.

- erê hejar murtecî’ be çî dełên?!

- bexwa mamosta minîş nazanim; bełam naxoşim dewê.

ewem hatewe bîr ke ew demey le tewrêz le bîmaristanî řûsan bûm, mudîrî dijbanîy tewrêz le ḧukmî pîşewerîda - ke nawî «nemazî» bû - degeł minda le jûrêk bûyn; ke ewîş nexoş bû. her qise de qise dekewt deygut: min komonîstim, ey to?

- dyare minîş komonîstim.

řojêk dway ewe gutî min komonîstim, pirsî:

- hejar! pêm nałêy komonîst çîye?

- nemazî gyan! ḧeram eger pitir le toy lê bizanim!