behare ey yar nazenîn peyker
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
1081 Dîtin
behare ey yar nazenîn peyker
tawê le hode ser bihêne der
nesîmî bonxoş şoxî beharî
ta bin mêşkî dił deka mu’etter
wirîcey şewnim leser bergî guł
ełmase ledewr yaqûtî eḧmer
çemen bû be dax neqaşxaney çîn
leber řengî guł leser sewze teř
le hemû layê koga buwe guł
her goşe piře le mîna û saẍer
gwêy her şetawê leber xeymey guł
wek nexşî manî hoş deba le ser
xeymey pîroze ełmas debarê
leser zimřûtî kêw û deşt û der
daran řast û řêk be keyf û paraw
gułî sûr beser cilî sûr leber
leser liqî guł bulbul be aheng
ełê boxoşî: biřyare bê ger
gułûg leser çił demî kirdewe
wek demî saway cwanî nazperwer
nazanim şetaw yam xo badeye
yam beheşte û ḧewz piř şîr û şeker
le neẍmey bulbul beser ẍunçeda
meynoşan şeyday dîdarî diłber
ta çaw kar eka guł û sewzîye
sara û serzewî empeř ta ewpeř
wekû firmêskî ’aşiq bo azîz
tafan deřêjin be xerman gewher
leser her coge yaranî gułřû
wek ḧorî beheşt ledewrî kewser
lenaw baxanda mest û des le mil
bê xemî dinya diłdar û diłber
bize leser lêw her dû des le mil
boy henase xoş çife bê xeter
nesîm zułfî yar pexiş ekatewe
cwantir le çinêr beřezay ser meř
’aşiq wek zirê deyxate ser şan
ełê řostemim kuřî załî zeř
beharî taze û katî cwanî
çî leme çatir ey yarî bawer
boy şiney behar ’etrî zułfî leyl
xoştir le nafey muşkî ahûy beř
sara û serçya doł û şîw û çem
hełdêrge û serkêw kaç û mawkemer
hatwete ziman be nałey melan
çak gwê řagre er nîte baweř
fesłî beharan katî şayye
xoş be ba neçê ’umirit be heder
seyrî newgułan zerd û sipî ke
bê xeyałî xam kogay sîm û zeř
wadey berbeyan henasey nesîm
piřşingî řûmet estêrey seḧer
lem behareda er be îxlas bî
nûr exate dił be danay dawer