henase sardekanî germyan

-1-
eger beyanîyek řêkewt
a lem deştey germyanda
kełêktan bînî, sersing sûr,
çwarpel sipî,
çaw agirîn.
hîç deng meken, desîş bigirin be singewe.
ewe: «ḧemeřeşe» key xomane û
beserdanê hatotewe bo lay «ḧemrîn»!.
eger nîweřoyek řêkewt
a lem deştey germyanda bazêktan bînî, gerdin sewz,
bał xwênawî,
peř ałozkaw..
bazêkî bêmał û hewar
hîç deng meken.. řêge berden
ewe «mela eḧmed»y xomane û
be serdanê hatotewe bo lay herdû
cûte xuşkî kifrî û kelar!
eger êwareyek řêkewt
espêktan bînî tewêłî kiłpedar û
yał narincî û
kelle biçûk.
hîç deng meken, diłtan xoş bê
ewe «mame řîşe»key xomane û
beserdanê hatotewe bo lay kerkûk!.
-2-
hemû sałê le naweřastî şubatda
le naweřastî sermada
le panzewe heta hejde
bangî şêwan, wekû derbendî baseře û diłî kêwan
dergay ḧewşey małekantan bikenewe.
le jûrewe tedarekî cejnê řêkxen:
çira hełken, agir xoşken, çayî demken
ałay sewz û sûr hełwasin,
serînî peř, cacmî nwê, pêxefî taze derbênin
mom û buẍurd bisûtênin.
taqe kełebab ser biřn.
bo mîwanê leş xoławîy û
birsî birsî egate cê
bo ’aşiqê le eşkewtî «darî xile»y
enfalewe kewtote řê
bo azîzê wekû kilûy befir û pirşing
wekû kizey dem sîrwan û
bonî giłî bawe şaswar
lem naweda peyda ebê
hemû sałê le naweřastî sermada
le panzewe heta hejde
dergakantan bikenewe û çaweřwan bin
«mela eḧmed» egate cê!.
-3-
ey kîjanî řeng řêḧaneyî
em mełbende
eger çûn bo řêwasan û
pîşokan û sêwî bin ’erd
her bineyek le şwênêkda
jimareyan geyşte ḧewt
bo mufeřkî sebrî ewîn hełyan bigirin.
ey kîjanî řeng řêḧane!
ew «ḧewt»ane:
ḧewt leşekey
ḧewt birakey
eşkewtekey
«darî xile»y germyane!.
-4-
serim girdî şehîdane û
qijim apurey jinanî ’eba beser
serim girdî şehîdane û
her şwênêkî hełbenewe
lempeřewe heta ewpeř:
pencey mangê yan dem û lêwî kanîyek
yan gerdinî qesîdeyek
yan kakołî gułe genmî mindałêkî
germyanî lê dête der!.
-5-
ewe «mang»e yaxud serî «ḧeme řeş»e ?
le banêjey ew hewrewe
eřwanête xwênî «ḧemrîn» ?!
ewe řîşał řîşałî azarî naw kerkûke?
yaxud řîşî mame řîşe
wekû lawlaw aławete,
dar firmêskêkî «xaneqîn»?!
ewe ḧewt peřey gułêkî naw enfale?
wekû ḧewt denke gêlasî çawî kelar
leser mêjûman řuwan?!
yan ḧewt pencey ḧewt estêrey
eşkewtekey darî xiley jimare çwar ?!