serdarî zumřey musîbet kêşan
Li pirtûka:
Dîwanî Mewlewî
Berhema:
Mewlewî (1806-1882)
3 Xulek
816 Dîtin
serdarî zumřey musîbet kêşan
fermanfermay mułk derûn piř êşan
badey xem werdey mergî nakaman
zam nasor keftey derûn piř zaman
perdey dił we nêş mewday xem pare
çar neberdey derd diłey bêçare
wextê seylî çem derûn piř xaran
taw mewest çun taw eweł beharan
boy kizey kewaw cergim çun caran
hem, wey, tem mewist ew řûy sitaran
bo piřûzî cerg qirçey parçey dił
boy hûnî coşyay derûnî piř çił
êd çun tofî sext tem wist ew kwan
ew wêney lafaw bałay to řewan
henasey syay serdî diłsozî
berd mida we berd bird ali’cuzErebîy
yanê namekey xem înşa kerde
merqûmî qełem we xem şeq werde
şołe da we giř şerarey narim
demya û coş da diłey xembarim
min wer ce amay namey zigarît
zûter ce xeber kosî dyarît
xatirim çend řo xestey xeman bî
çemanim çun taf safî çeman bî
ce amay namet çemerîm berz bî
şadîm şêwya, şînim sed terz bî
şem’î şamî şûm matem hurgiřya
tay telî semtûr şadî û zewq biřya
şay şadîm şikya, supay xem cem bî
beydaxî demax şêwey matem bî
dexîl bîm we nutiq xeman lał kerdem
lałam ce xeyał xem ẍaret berdem
namerd, ye wadey şînî bêşomen
hîç kosim nîyen, ye kosî nomen
sa dey, hey pey key her yek ce layê
bawerîn ew saz şîwen sedayê
xeyał ẍemgîn bî, nutiq ama we deng
êd mwat we soz zayłey sed řeng:
nakamî eyyam kameranîm řo
ber newerdey baẍ newciwanîm řo
şabî şêxî ’eşq yektay ferdim řo
we nakam merdey dił piř derdim řo
kengerey eywan kaxî dînim řo
tuřey lay tełay řay yeqînim řo
ḧellalî ’uqdey řagey şer’im řo
řehnumay terîq cadey wer’im řo
kê ne tefasîr qur’an bido dem
kê bo eḧadîs řesûl kero cem
kê we sirfErebî û niḧuErebî xatir kero meḧu
kê wadey ta’et dem bido ne seḧuErebî
henî kê adabErebî we adab wano
kê ’îlmî mentîqErebî ce mentiq zano
muteweّliErebî pey kê tûl do ’îbaret
ba muxteserErebî bo we bê’îşaret
kê we quwey ’îlim zekay ḧeq bînî
dem bido ne «kune» ’îlmî «çeqmînî»
feqê bêtedrîs, medrese bêzewq
mizgî bê’îmam, cema’et bêşewq
’alman bêfkir, şa’îran matem
nazk xeyałan ẍerqî deryay xem
mîrzam çun bêwext we nakamî dił
wer ce min teşrîf berdî we toy gił
şad bî we ḧûran xasey cînanî
temennay wêt bî leqay subḧanî
menził mubarek, bêhemtat yar bo
şefaxwat řesûl xasey muxtar bo
bêzeḧmet ce hewł meḧşer azd bî
we lutfî îzed řeḧmanî şad bî