řa ce’fer’abad saray germî meyl
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
834 Dîtin
řa ce’fer’abad saray germî meyl
menził şîraz şar sewday ’eşqî leyl
desudîm we aw řukni’abadî şewq
îmamî mîḧrab ser muselaّErebîy zewq
xwacey ser ḧełqey bezmekey elest
demax we neş’ey badey fena mest
xeylêwen azîz, şay newnemaman
pey şîfay zaman nameş neyaman
hîç neberden nam xestey derdekeş
nekerden xeyał meynet werdekeş
yadiş guzergay dił ce wîr berden
meyliş řay xatir feramoş kerden
satê we sałê ce lam wiyerden
heres we małim maçî diłserden
dił bê’aramen daym mido çił
min her mwaçûn pey dił weşîy dił
min tałem we tam tałî tał werde
gerdî bedbextîm we řûda merde
nam ne ser zwan şîrînş tałim
nam pey xatirş gerden xeyałim
nedaro taqet teḧrîrim xameş
mepêço we hem ce derdim nameş
maway diłgermîş ce ḧed berşîyen
layq we menził yadî ew nîyen
xatirim yend xar meynet ha têşda
pay meyliş zeḧmet buyero pêşda
sed delîl marûn nîyen feraqet
ce min hay tamił, ce ew kon taqet?
bo beşqî ew cam, ew bezim, ew cem
bêmeylîy azîz newînî we çem
mizanî çenîm çem ha we řawe
er wey zû meyo peykê ce lawe
mawero namey cam cemînekem
dîdey dinya û dîn, dinya û dînekem
yek ẍezeł metłe’ «mijde ey dił» bo
bawer, beł pey dił teskîn ḧasił bo
wer bo neyşełła limêş têkeł bo
xwace to pîrit ba her mucmeł bo
çi ḧacet serîḧ to bwaçî pêm
min zûm şinasa bextî syay wêm