şar
selamêkî germuguř û piř bedił pêşkeş begwêgrî hogrî huner û bîstyarî hestyarî bernamey tapo. tikaye le seretay bernamekemanda gwê bigirin bo parçe şî’rêk le şwênewarî nûserî bernameke:
:gułim! diłim piře le derd û kuł
:dełêm biřom le şareket
:dełêm becamê awî kanyawî dêyekem
:’elacî kem
:kułî diłî piřim, le derdî întizareket!
:weřez bû gyanî min le şar û hařehařey ew
:le řojî çiłkinî nexoş û taw û yawî şew
:dełêm biřom le şareket
:le şarî çaw leber çiray nê’on şewareket
:biřome dê ke mangeşew bizête naw bizem
:çilon bijîm le şareket ke piř bedił dijî gizem.
:le şareket ke řemzî asin û minareye
:melî ewîn ẍewareye;
:dełêy le dewrî dest û pêm
:ewey ke têl û tan û rayełe, kelepçeye
:ewey ke peykere mîsalî dawełe
:ewey ke daretêle mezherî qenareye!
:le şareket kemendî dûkełe
:ke dête der le małî dewłemend
:we tîşkî bê gunahî xoretaw exate bend!
:le her şeqam û kûçeyek şepolî şîne dê berew diłim
:destî germî aşna nîye ke eykuşim
:destî çêwîye!
:le şareket zelîle şêr,
:bawî řêwîye!
:beher nîgayek û petayeke!
:ełêm biřom le şareket gułim!
:gułim herêmî zong û zel
:çilon ebête caře guł?
:le şarî to
:le banî ’eřşe qonderey diraw
:şareket, aske cwanekem
:teske bo ewîn û bo xefet heraw!
:kê le şarî to, le şarî qatłî hejar
:gwê edate ayetî peřawî dił?
:minê ke goçî tawî germî ber dewarekey ’eşîretim
:bedare termî kûçe tengekanî şareket
:řanehatuwe leşim!
:binarî piř beharî dê
:řengî sûr û şîn eda le şî’ir û ’atîfey geşim!
lawêkî dêhatî ke beyanî řengawřengî beharaney hewarî çyay berzî dîwe û hemîşe çawî beřwangey berîn û řaxrawî deştî beguł û gya xemłîw řahatuwe, dête şar. kołanî teng û dirêj wek tabût leşî azadî ew lawe eguşê. hezaran bendî řesim û yasa le dewrî dest û pêy hogrî řizgarî ew ebête kelepçe. řwanînî şar cyawazî heye legeł nîgay mêhrebanî dê. le şar jyan çeşnî pyaz, hemû têkułe û kakłî nîye. řwałetî jyan řazawe û şikodar, bełam řengî ew jyane řengî deskire. herwek řengê ke lêw û gonay afretî şar sûr eka. bełam le dê, hemû şit siruştîye. tenanet sûrayî nîwe řengî lêwî bizetêzawî kiçê ke le jêr germay řwanînî lawêkî ewîndara şewnimî şerim ekewête ser gułî gonay û xwênî hestî pakî kiçane bepêstî nermî demuçawya egeřê, řengêkî siruştîye. lawî dê nişîn behezar hewday awrîşmîn beřabirdûy xoyewe bestirawe, fêr nebuwe koşkî de nehomî ser le asman bibînê û bo ewe temaşay bika kiławî serî berbêtewe. le dê xanûberey lar û komî dîwe bełam hengawî larî le řêga laderî nedîwe...
lew ḧałeda diłî eda bekçêk ke wek gułî leylûpeřî awî le naw zelkawî şara pişkutuwe. dû hêzî kêşer bo dû lay cyawazî ekêşin; hêzî ewîn fermanî manewey edatê le şarêka ke çeşnî pêławî teng pêy řêbwarî ewîn azar eda û hêzî derçûn û řizgarbûn le kemendî dûkeł û diraw û geřanewey bo dê û dîsanewe destemlanbûnewey bîrewerî xeyał wirûjênî hest bizwênî serdemî minałî û gencî le ladê û em şî’rane akamî berengarî ew dû hêzen le henawî lawekeda û ebînîn ke tenanet zincîrey zêřînî ewînîş pêy řewekî laweke nabestê û eçêtewe dê ke řengî sûr û şînî beharî binar le ’atîfey geşî bida.
ta bernamey dahatû xwatan legeł