basî goranî gutnî nekîsa be zubanî şîrînewe
Li pirtûka:
Şîrîn û Xusrew
Berhema:
Kemalî (1886-1974)
5 Xulek
11 Dîtin
şapûr nekîsay birde lay şîrîn
gutî danîşe lêre be temkîn
gwê bigre bełam memke temaşa
çî dełêm be to bîłê be seda
bîgêřerewe baş be goranî
kes ferqî neka her xot bizanî
barbud nawîş mutrîbî şa bû
le dengî xoş û neẍme sera bû
le xizmet xusrew be neẍmexwanî
xwêndyewe şî’rî xoş û goranî
şîrînî ermen gutî nekîsa
dexîl û aman be niẍmey newa
çend hełbestêkî şîrîn û diłkeş
pêt dełêm bîłê be awazî xoş
ca em şî’raney gut be nekîsa
ewîş xwêndîyewe be neẍmey newa
şî’irxwêndnewey nekîsa be zubanî şîrînewe
gutî ey tał’ desa řojî çend
lepêm derhêne to zincîr û bend
qet be wêney min nîye ze’îfê
wekû min nîye hergîz ḧerîfê
boçî wek şîbir emxeyte ser xak
xom awa kewtûm zelîl û ẍemnak
wek guł le ’îşqa perdem diřîwwe
řûy dunyam heta êsta nedîwe
ẍerîb û bêkes ẍembar kewtûm
destim biřawe le îş dwakewtûm
min betemay to gyanmida be ba
jyanî xomim dawe be fena
hîç xoşîm nedî le řûy zemane
bûm be nîşane bo tîrî tane
cwabdanewey barbud be zubanî xusrewewe
em şî’raney xwênd katê nekîsa
barbud lewla dengî lê hełsa
gutî sibeynê lelay baẍî guł
řabûrdim mest û serxoş û xoşdił
gułî şestipeřî cwan û nazenîn
be diřk dewrey kirabû perjîn
dergay baẍeke daxrabû le min
qufłî neşkabû be destî duşmin
lew hemû gułe û mîwey taze û teř
hîçim dest nekewt ẍeyrî derdî ser
perî řûyekî şoxî canane
peydabû lepiř boy bûm dêwane
nazenînê bû be ziřey xiłxał
sofî sed sałey dehênaye ḧał
qesem be taqî biroy xemîdey
be nêrkisî mest ye’nî dû dîdey
qesem be zułfî wekû kemendî
be bejin û bałay serûy biłindî
ger destim kewê hetakû zîndem
ew padşabê minîş her bendem
barbud wextê emey tewawkird
nekîsa cwabî dawe destubird
cwabdanewey nekîsa be zubanî şîrînewe
gutî le řêta xo min bûm be xak
sayem bixe ser ey serûy çalak
lem baẍe hîç kes mîwey neçnîwe
derga daxrawe kesê neydîwe
bo henarî min her kes biba dest
destî lê nada zû deykem sermest
kesê byewêt le sêwim bixiwa
wek minał tefrey dedem bexwa
ger leserim den wekû findiq seng
to nebî hîç kes lêm nabînê řeng
hetakû dunya mawe û demênê
hîç kes bo mîwey min dest nahênê
barbud emey gwê lê bû dîsan
cwabî nekîsay dayewe zor cwan
cwabdanewey barbud be zubanî xusrewewe
gutî bonî dost dêt le demaẍim
xeyałî gencî heye çeraẍim
lam waye lelay şîrîne xusrew
kewa xerîke dêt beharî new
meger bay beheşt hat guzerî kird
le diłma xoşî wa eserî kird
ey tał’ biłê bew perîzade
estêrey se’dim bikat amade
serîşim bibřê eger wekû meř
wek seg dadenêm leber dergat ser
her wekû masî dûr bêt le derya
dûr mamewe lêt ’aciz û tenya
eme ’umrêk le çawmaye cêt
têr maçim dekird xozge berî pêt
ya derdî dûrîm tozê dewa ke
ya gyan le laşem qurban cya ke
lêm bûyt be awî coy zîndeganî
ke leber çawim da’îm penhanî
cwabdanewey nekîsa be zubanî şîrînewe
ke destubirdî barbudî dî
şîrîn le ’îşqa karî becêy dî
gutî nekîsa dexîl û aman
eme biłê bom destim be daman
me’lûm bê le to yarî bewefa
wek dwênê řoyşit emřoş her deřwa
emřo behare fesłî newroze
wextî ’îşrete diłan piř soze
ew gułey behar kes bonî neka
be badî xezan deçê be fena
arezûy diłim le tafî cwanî
her wesłî toye paş zîndeganî
be her new’ê bû ta emřo qurban
lenaw perdeda min bûbûm penhan
le perdey tarîk ẍem perwerewe
wekû birûske hatme derewe
min hetakû key bikem xeyałit
bereła dekem řûm bo cemalit
dadenîşim lat bedłêkî şad
le řenc û mîḧnet xom dekem azad
ke em qisaney gwê lê bû xusrew
eḧwałî têk çû kewte tekudew
nałandî gutî barbud aman
xerîke derçê le bedenim gyan
cwabî barbud le zubanî xusrewewe
lecyatî şahî piř ’eqił û kemał
barbud cwabî dayewe derḧał
gutî ey senem min ’uzirxiwahim
bibexşe be min curim û gunahim
le kirdewey xom zor peşîmanim
be şefî’ dênim çawî giryanim
min xo hîç berim nexward le cwanî
to berxurdar be, be kameranî
em şî’raney xwênd barbud emca
şîrînî ermen zor diłî sûta
hawarêkî kird be dił piř be dem
gwêy le dengî bû padşay ’ecem
wek yekê le kêw deng bidatewe
ew kêwe derḧał cwab dedatewe
le dengî şîrîn xusrew destubird
yexe û berokî parçeparçe kird
be bangî berz û be giryan û şîn
hełsa řûy kirde xêmekey şîrîn
şapûr ’erzî kird gutî şehryar
dexîlim meço jûrewe zînhar
basî şîrînî tewaw sertapa
gêřayewe bo şahî ’alî ca