lawra

lawra
piłinge şî’rî xoş nawê!
lawra ełê: honrawey to û
piłinge tûře û birsîyekan leyek eçin.
lawra ełê: ke şew dadê
le zîkeyan etirsim.
her pêm ełêt û pêm ełê:
wek enûsîy be bałî kotrê binûse!
be denûkî çolekeyek
yaxud be řûmetî gułê
boçî be çiřnûkî piłing?
çî bikem, lawra, piłing nebûm
ne be deng û
ne be çing û
ne be sîma
bełam lawra «dawe»kanî her çwar dewrim
to ew «daw»anet bîr neçê?
lawra
be hawara û bange bangî çyakanim
be hełsane serpêy berd û
be dengî berzî dirextim
zor pest ebê!
lawra ełê: nizim bidwê
mebe be givey şêtwêt
mebe be çemî zistane û
deng hełmebře
nizim, nizim, nizim bidwê!
çî bikem lawra! minîş hemîşe her sirwem
le řeşeba û
mangeşewm le gerdaw, la cwantir buwe
bełam axir sêdarekan lawra!
sêdarekanî çwar mergim
sêdarekanit bîr neçê!
lawra
le wiřêney şewanem û
le cûłecûłî xeyałim û
le teqewřeqey hatuçoy mekoy janim
dehrîy buwe û
wa xerîke mał cê bêłê!
lawra ełê: de be aramî pałkewe
be aramî xew bibîne û
wekû em xełke řakşê!
çî bikem lawra!
minîş her ḧez bewe ekem
buxçey hewrêkî şilumil serînim bê.
wa ḧez ekem, wek çarogey
belemêkî ser řûy zerya
leber sayeqey şewêkî diłnyada
lerem neye!
bełam lawra, axir lawra, enfalekan
enfalekanit bîr neçê!
lawra řiqî
le řengî giryan û bonî
şîn û şepoř ebêtewe
lawra ełê:
em temumje labere leser çawit
ew perdeye hełberewe leser xemit û
řûn berewe
wek sipêney çawekanim řûn berewe
wekû qijim birîsket bê û
wekû xwênim qułp bide û
wek sipîdey gerdinîşim
şewq berewe!
çî bikem lawra! çî bikem minîş
zor ḧez ekem şepolî pêkenîn bimba
zor ḧez ekem, pirşingekanî goranîy dampoşin û
zor ḧez ekem, bibim be geła şî’rêkî hełfiřîwî nîweşewî bandî sema
bełam lawra! axir lawra! to hełebceCih,
to hełebcemit bîr neçê!
lawra nayewê qet çarey
şî’rî syasîm bibînê
ew gelê car, le jûrekem deryan ekat
ew gelê car, çekyan eka û
pênaseyan esûtênê û
diruşmekanyan edřênê!
lawra ełê: em gijebay syasete
wextê ke dêt
řoḧî şî’ir ejakênê
şewnimyan wişk ekatewe!
lawra ełê: ew şî’ranet
małyan piř kirdûm le dûkeł
le bokřûzî ẍerîbî
le bonî gogirdî xwên û
le nałenałî sêdare û le temtumanî tenyayî
ew şî’ranet, sûtû leser kursîyekem û cilkekanim û çerçefî pakim cê dêłn
leser mafûrî hołekem,
cê pêy xwênawîy cê dêłn,
legeł xoyan quř û lîtey koç û koçřew
ehênne naw dałanmewe
çî bikem lawra, syaset lay ême lawra!
le desrazey naw bêşkewe takû kifin
le leşmanewe aławe, lawra!
hemû řojê nan û meraq
legeł syaseta exoyn, lawra!
le hawserekanman zyatir
legeł syaseta enûyn, lawra!
le mindałekanman zyatir legeł ewda da’enîşîn, lawra!
bełam lawra, axir lawra, kurdistanim, kurdistanim
to kurdistanit bîr neçê!